Кун Кенешысь 33 депутатъёс «Единая Россия» партилэн кандидатъёсты азьлапал быръёнъёсаз пырисько
18.05.2022«Единая Россия» партия тулыс ик мытӥз ни туэ Огъя куара сётон нуналлы дасяськонзэ — Кун Кенешысь депутатэ кандидатъёсты азьлапал ик бырйыны кутскиз.
Туэ 11-тӥ сентябре 15 улосъёсын ортчозы улос йыръёсты быръёнъёс, выльдӥськозы 6 улосъёслэн парламентъёссы но 12 городъёслэн Думаоссы. Удмурт шаерын быръёмы Кун Кенешлэн 7-тӥ ӧтчамаз депутатъёсты. Та быръёнъёсын кандидат луыны ӵектӥськисьёслэсь куриськонъёссэс кутон йылпумъяськиз 13-тӥ мае. Табере 27-тӥ маёзь радъяське соос понна куаразэс сётыны мылкыд карисьёсты пусъён (регистрация) — тазэ лэсьтыны луэ кун услугаосъя огъя портал пыр. 23-тӥ майысен 29-тӥ маёзь ӵектӥськем муртъёс пӧлысь устооссэ бырйыны луоз. 31-тӥ маёзь партилэн кандидатъёсызлэн нимъёссы шараямын луозы.
«Единая Россия» партилэн кандидатэз луыны мылкыд кариз 3 сюрс 700 адями. Соос пӧлысь 36 процентэз — 35 аресозь егитъёс, политикаын нырысетӥ вамышсэс лэсьтӥсьёс. Пӧлазы тужгес но трос нылкышноос: дышетон, тазалыкез утён удысъёсын тыршисьёс. Озьыен, улосъёсысь закон кылдытъян ёзъёсын кылдыны быгатозы выль адямиос.
«Удмурт шаерын кандидатэ ӵектӥськиз 309 мурт. Соос пӧртэм арлыдъем, уно пӧртэм удысъёсысь. Пӧлысьтызы 33 мурт — Кун Кенешлэн таяз ӧтчамысьтыз «Единая Россия» фракцие пырись депутатъёс. Пусйыны кулэ: огъя кунамы сямен ик, улосамы но кандидатэ ӵектӥськисьёс пӧлын нылкышноослэн лыдзы йылӥз. Кандидатъёс понна куаразэ сётон вылысь регистрация пыр ортчиз ни 72 сюрслэсь ятыр адями. 27-тӥ маёзь пусйиськыны луоз на. Шаерамы улӥсьёсты ӧтисько куара сётонэ пыриськыны. Азьлань улонмес радъяломы дэмен», — шуиз «Единая Россия» партилэн Удмурт ёзэзлэн секретарезлэн нырысетӥ воштӥсез, Кун Кенешлэн Тӧроез Владимир Невоструев.