Ижкарын «Педагог года Удмуртии – 2022» элькун вожвылъяськонын вормисьёсты ӟечкылазы

Удмурт филармониын данъязы "Арлэн дышетӥсез" конкурсын вормисьёсты. Сооосты ӟечкылазы Удмурт Элькунысь Кун Кенешлэн Тӧроез Владимир Невоструев, Кун Кенешысь наукая, дышетонъя, культурая, туризмя но йӧскалык политикая ялан ужась ӧрилэн тӧроез Татьяна Ишматова. Правительстволэн Тӧроезлэн воштӥсез Татьяна Чуракова, Кун Думалэн депутатъёсыз Лариса Буранова, Олег Гарин но мукет кивалтӥсьёс.
Вожвылъяськонлэн 1-тӥ тураз 294 дышетӥсь пыриськиз. Конкурслэн кыкетӥ люкетаз 57 педагогъёс потӥзы. Соос пӧлысь 11 мурт вуиз финалэ. Котькудзы ик педагогъёс вормисьёс ни, соос нимысьтыз номинациосын пусъемын.
Вормисе потӥз Ижысь промышленно-экономической колледжысь педагог Мария Набатчикова.
"Вуоноысь дышетӥсь" номинациын вормиз К. Герд нимо гимназиысь историен дышетӥсь Артём Малинин.
"Педогогический дебют" номинациын ваньзэсты азьпалтӥз Воткинскысь 1 номеро школаысь дышетӥсь Дарья Хлебникова.
"Устоез воспитатель" луиз Глазовысь 56-тӥ нылпи садысь крезьгуръя дышетӥсь Елена Сабрекова.
"Дышетон удысын азьветлӥсь" нимамын Вотка ёросысь Гавриловка гуртысь нылпи садэн кивалтӥсь Ирина Лопатина.
"Устоез вожатой" номинациын вормиз Ижысь 78 номеро школаысь организатор Николай Старков.
"Устоез классэн кивалтӥсь" луиз Ижысь 30 номеро школаысь Анастасия Волкова.
Ватсаса тодон-валан сётон удысын устоез педагог луиз Ижысь Савелий Кузнецов.
"Устоез педагог-психолог" номинациын вормиз Якшур-Бӧдья школа-интернатысь Гузалия Нурисламова.
Ляб тазалыко нылпиосын ужась дышетӥсьёс пӧлын эшъёссэ азьпалтӥз Ижысь 81 номеро школаысь логопед Ольга Лукьянова.
"Устоез наставник" номинациын вормиз Ижысь 56 номеро гимназиысь историен дышетӥсь Марина Орлова.