Версия для слабовидящих
Владимир Невоструев журналистъёсын пумиськиз

Владимир Невоструев журналистъёсын пумиськиз

29.12.2021
Владимир Невоструев журналистъёсын пумиськиз
Туннэ Удмурт Элькунысь Кун Кенешлэн Тӧроез Владимир Невоструев Журналистъёсын пумиськылӥз. Со депутатъёслэн ар куспын ужамзылы йылпумъянъёс лэсьтӥз.
Берлояз ортчем сессиын Кун Кенеш воштонъёс пыртӥз быръёнъёсын герӟаськем законэ. Табере элькун парламентэ 60 депутат пӧлысь 20-ез партиослэн списокъёссыя бырйиськозы, 40-эз – одӥг мандатъем округъёсъя. Вуоно арын 1-тӥ февралёзь быръёнъя округъёсты выль сямен чаклалозы, котькудаз шорлыдын 25 сюрс бырйись луоз.
«Федерал законъя улосъёс быдэсак выжыны быгато ни одӥг мандатъем округъёсъя быръёнъёсы, - пусйиз Владимир Невоструев. – Огласянь, со шонер, малпасько. Угось партиослэн списокъёссыя ортчись куд-ог кандидатъёсты бырйисьёс адӟыса но уг вутто. Нош одномандатникъёсты туж умой тодо – соос ялан калык пӧлын, дунъет сётыны луэ ужамзыя».
Со сяна, Кун Думаысь «Единая Россия» фракцие пырись депутатъёс кичӧлтонэн потӥзы: котькуд депутат бырйисьёсыз азьын вераны кулэ мар лэсьтэмез сярысь.
«Малпасько, та но туж шонер шуыса, - пусйиз Кун Кенешлэн Тӧроез. – Депутат калык понна ужаны кулэ. Соин ик туж умой, куке со бырйисьёсызлы мар лэсьтэмез но мар эшшо лэсьтоно шуыса чакламез сярысь вера. Нялтас адямиослэсь дэмланъёссэс кылзэ. Таӵе решение кутэмлэсь азьло ик мон бырйисьёсыным пумиськылыны кутски ни. Озьы туж умой валасько, макем кулэ луо таӵе синмысь синме пумиськонъёс».
Ар куспын Кун Кенешысь депутатъёс 140 выль законъёс юнматӥзы. Со сяна, кичӧлотонъёс дасязы Кун Думае. Берлоез герӟаськемын Россия но Удмуртия куспын коньдонэз люконэн. Али шаермылэн бадӟым люкетэз вытъёсыз кошко федерацие. Кылсярысь, туэ 178 миллиард манет отчы келямын.
«Та кичӧлтон выль ӧвӧл ни, - пусйиз Владимир Невотсруев. – 2015-тӥ арын Кун Думаын но Федерацияя Кенешын ортытӥм Удмуртилэсь нуналъёссэ. Соку ужпум ӝутӥм ни, 50 процентэз ке но вытъёсмы элькунамы мед кылёзы шуыса. Со вакытэ 66 процентэз Москвае кошке вал. Нош али та лыдпус уката йылӥз. Мон уг шуиськы, Москва элькунмылы уг юрттӥськы. Нацпроектъёс чотын ик уно уксё берыктӥське. Озьы ке но республикамес азинтэм потэ. Сиыны-юыны коньдон ум куриське ук. 50 пала проектъёсмы вань, коньдон луиз ке, соосты коть али ик быдэсты. Кылсярысь, М7 федерал сюресэз паськытатоно, аэропортозь сюресэз выльдоно. Нош «Вуоноысь гурт» - кыӵе тунсыко проект! Уксё луысал ке, малы меда тросгес гуртъёсты туала каронтэм?!»
Кичӧлтонэз Москваын мед кылозы шуыса, Кун Кенешысь депутатъёс Элькун Тӧроен, Правительствоен дэмен ужаны мылкыд каро. Со сяна – Удмуртиысьтымы Кун Думае быръем депутатъёсын но.



Возврат к списку