Тодмотэм ожгарчилэн нуналаз Ижкарысь ожъя но ужъя данлыклэн Монументэз доры сяська понӥзы

Туннэ, 3 толсуре, Россиын Тодмотэм ожгарчилэн нуналыз пусйиське. Солы сӥзьыса, Ижкарын сӥё-дано ужрад ортчиз. Калыклэсь 1941-1945 аръёсы тыршемзэ сӥлы карись ожъя но ужъя данлыклэн Монументэз доры сяська керттэтъёс понӥзы. Ужрадэ пыриськиз Кун Кенешысь «Единая Россия» фракцилэн кивалтӥсез Елена Дербилова, физкультурая, спортъя но егитъёсын ужан политикая министр Александр Варшавский, «Долг» мерлыко огазеяськонлэн ёзчиосыз, «Юнармия» движение пыриськисьёс, кадет классъёсын дышетскисьёс, карын улисьёс но шоркарлэн куноосыз.
Тодмотэм ожгарчилэн нуналыз – Быдӟым Атыкай оже пыриськем улосчиосмес, озьы ик вань мукет ожмаськонъёсын бырыны сюрем но ивортэк ышем солдатъёсты буре ваён нунал. Та нуналэ 1966 арын тодмотэм ожгарчилэн лысьӧмъёсыз сӥё-дано ватэмын вал Москваысь Кремльлэн борддорез вӧзы.
«Единая Россия» фракцилэн кивалтӥсез Елена Дербилова ышем ожгарчиосты утчанын но сӥлы каронын поисковикъёслэсь бадӟым ужзэс но интызэс пусйиз. Быдӟым Атыкай оже Удмуртия 300 сюрслэсь трос нылпиоссэ келяз, ӝыныез соос доразы ӧз берытске ни, уноез туннэ но ивортэк ышемен лыдъясько.