Удмуртиын культура удысъя инъет луись катэз кылдытон уж йылпумъяське

Наукая, дышетонъя, культурая, туризмъя но йӧскалык политикая ялан ужась комиссилэн кивалтӥсез Татьяна Ишматова «Удмурт Элькунын культура удысъя кун политикаез быдэсъян сярысь» катӵектосэз дасян ужпумъёслы сӥзем кенешон ортчытӥз.
Вераськонэ пыриськизы Удмуртиысь культурая министр Владимир Соловьёв, Кун Кенешлэн депутатэз, Удмурт йӧскалык театрлэн кивалтӥсез Андрей Ураськин, Ижкар Думалэн депутатэз, Удмурт кун филармонилэн кивалтӥсез Алексей Фомин, Удмурт Элькунысь Мерлыко палаталэн кивалтӥсез Рашид Хуснутдинов, Удмуртиысь театр ужасьёслэн огазеяськонзылэн кивалтӥсез Александр Мустаев, Элькунысь калык творчествоя юртлэн кивалтӥсез Светлана Кайсина, йӧскалык политикая но коньдон ужпумъёсъя элькун Министерствоосысь ужасьёс.
Катӵектос культура удысъя кун политикалэсь ужпумъёссэ, амалъёссэ, быдэсъясь ёзъёссэ но соослэсь ужоскетъёссэс, театръёслы, филармониослы, концерт огазеяськонъёслы юрттэт сётон ужрадъёсты пусъе, озьы ик культура удыслы ӧнерчиосты дасянэз чакла.
«Жаляса верано, выль федерал кат татчыозь кутэмын ӧвӧл на, - шуиз Татьяна Ишматова. Али 1992-тӥ арын юнматэм законъя ужаськом, нош солэн уноез куронъёсыз вакытлы уг тупало ини». Татьяна Ишматова пусйиз, катӵектосэз дасян уж матысь дыре йылпумъямын луоз шуыса.