Ижкарын Промышленностья форум ужзэ мытӥз

Удмуртилэн шоркараз 15 куарусёнэ Промышленностья форум ужзэ мытӥз. Сое усьтон сӥё-дано ужрадэ пыриськизы Кун Кенешысь агропром огъетъя, музъем кусыпъёсъя, инкуазез уже кутонъя но сое утёнъя ялан ужась ӧрилэн кивалтӥсез Владимир Варламов, Элькун Кивалтэтлэн Тӧроезлэн воштӥсез Анатолий Строков, промышленностья но вузкаронъя министр Виктор Лашкарёв, Россиысь МЧС-лэн Удмурт Элькунъя Валтӥсь управлениезлэн кивалтӥсез Пётр Фомин, Ижкарлэн Тӧроез Олег Бекмеметьев, Кун Кенешлэн депутатэз, Удмурт Элькунысь крестьян но фермер возёсъёслэн, кооперативъёслэн но нимаз возёсъёслэн огазеяськонзылэн кивалтӥсез Михаил Лебедев.
Туэ форуме Россилэн 9 улосвылъёсысьтыз 50 предприятиос пӧртэм вузъёссэс поттӥзы. Адӟытонъёсын асьсэлэсь выль ужъёссэс возьмато Удмуртиысь валтӥсь предприятиос но: «Аксион-Холдинг», «Воткинский завод», «Белкамнефть» но мукет огазеяськонъёс. Нимысьтыз сэрег кышкытлыкъёслэсь утиськон тӥрлыклы но амалъёслы сӥземын.
Промышленностья форум Удмуртиын 17 куарусёнозь ужалоз. Адӟытон сяна, солэн программаяз семинаръёс, котрес ӝӧкъёс, презентациос но кенешонъёс чакламын.