Удмуртиысь егитъёслэн парламентъёссылэн спартакиадаязы вормисе потӥз Вотка ёрослэн командаез

Сарапул карысь «Энергия» стадионын 11 куарусёнэ Удмуртиысь егитъёслэн парламентъёссылэн спартакиадазы ортчиз. Отчы ёросъёсысь но каръёсысь 8 команда пыриськиз. Спортсменъёслы пумитан кылъёсын вазиськиз Кун Кенешысь физкультурая, спортъя но егитъёсын ужан политикая ялан ужась комиссилэн кивалтӥсез Иван Черезов но Сарапул карлэн Тӧроез Виктор Шестаков. Соос таӵе ужрадъёслэсь тазалыко улон сямъёсты вӧлмытон но егитъёслэсь парламентъёссэс огазеян понна кулэлыксэс пусйизы. Спартакиада куинь амалъёсъя мынӥз: шулдыр стартъёс, серемес футбол но гозыез кыскан.
Ӟырдыт нюръяськонын вормисе потӥз Вотка ёросысь егитъёслэн парламентсылэн командаез, кыкетӥ луизы Якшур-Бодья ёросысь егитъёс, куинетӥ интыез басьтӥз Сарапул ёрос.