Владимир Невоструев Яр ёросын ужаз

Кун Кенешлэн Тӧроез Владимир Невоструев 13 гудырикошконэ ужаз Яр ёросын. Ёрослэн тӧроеныз Александр Старцевен ӵош со кӧня ке гуртъёсын улӥсьёсын пумиськылӥз, ваньбур поттон но мерлыко ужъюртъёсы вуылӥз.
«АгроЯр» огазеяськонлэн кивалтӥсеныз Геннадий Трефиловен вераськиз сильтӧлэн ваем ыштонъёсты берыктон сярысь. Кужмо тӧл татысь КЗС-лэсь, кеносъёслэсь, ангаръёслэсь липетъёссэс нуиз. Ю тысь возён интыосы зор пыриз, 100 тонна пала кидысэз изъянтӥз. Сильтӧл озьы ик Байдалино но Моисеево гуртъёсын улӥсьёслы ыштонъёс ваиз. Кӧня ке семьялы юрттэт сётӥз ини Кун Кенешысь депутат Андрей Волков.
Элькун парламентлэн спикерез озьы ик «Восход» огазеяськонлэн кивалтӥсеныз Александр Сунцовен но фермер огазеяськонэн кивалтӥсь Андрей Снигирёвен пумиськылӥз.
Яр каргуртын Владимир Невоструев «Формирование современной городской среды» программа улсын мынӥсь ужъёсын тодматскиз.
«Пудемское» мыниципал кылдытэтын улӥсьёс черкогуртысь «Металлург» культура юртэз тупатъяны юрттэт куризы. Сое 2022 арлы программае пыртыны кенешизы. Пудемын Владимир Невоструев Яр ёрослэсь Дано кунмуртсэ, муниципал кылдытэтлэн мерлыко кенешезлэсь ёзчизэ Алевтина Васильевна Британэз 80 арес тырмонэныз ӟечкылаз.
Та нуналэ ик Кун Кенешлэн Тӧроез Ворца гуртын улӥсьёсын соосты сюлмаськытӥсь ужпумъёс сярысь кенешиз.