Версия для слабовидящих
Агропром огъетъя, музъем кусыпъёсъя, инкуазез уже кутонъя но сое утёнъя ялан ужась ӧрилэн кенешонэз ортчиз

Агропром огъетъя, музъем кусыпъёсъя, инкуазез уже кутонъя но сое утёнъя ялан ужась ӧрилэн кенешонэз ортчиз

11.08.2021
Агропром огъетъя, музъем кусыпъёсъя, инкуазез уже кутонъя но сое утёнъя ялан ужась ӧрилэн кенешонэз ортчиз
Владимир Варламов 10 гудырикошконэ агропром огъетъя, музъем кусыпъёсъя, инкуазез уже кутонъя но сое утёнъя ялан ужась комиссилэсь кенешонзэ ортчытӥз. Видеоконференция амалэн вераськонэ пыриськизы Элькун Кивалтэтлэн Тӧроезлэн воштӥсез - гурт возёсъя но сиён-юон поттонъя министр Ольга Абрамова но ваньбур кусыпъёсъя министрлэн нырысетӥ воштӥсез Антон Сычугов.
Ольга Абрамова гурт удысын кылдэм югдур сярысь ивортӥз. Солэн верамезъя, туэ нырысетӥ палар ӵоже агропром огъетын ваньбур поттон 3,6% йылӥз (Приволжск ФО-ын – 0,1%, РФ-ын – 0,4%). «Ваньбур поттонэз йылэтонлэн ӝоглыкезъя Удмуртия Россиысь улосвылъёс пӧлын 16-тӥ инты басьтэ. 2017-тӥ арын асьмеос та ласянь 64-тӥ интыын вал, 2018-тӥын – 44-тӥ, 2019-тӥын – 37-тӥ, 2020-тӥын – 31-тӥ», - пусйиз кивалтӥсь. Гурт удыслы висъям юрттэтлэн быдӟалаез элькун бюджетлэн 2,6 % луэ.
«Туэ бадӟымесь сюлмаськонъёс ваиз кӧс куазь. Чакламъя, гуртоос 495 сюрс тонна ю тысь люкалозы. Со ӧжыт. Шугъяськонъёс кылдыны быгатозы кидысэн но, фуражен но», - шуиз Ольга Абрамова.
Элькун Тӧролэн пуктэмезъя, 23-тӥ пӧсьтолэзьысен быдэс шаерамы шимъюгдур ялэмын. Со гурт предприятиосты Россиысь гурт возёсъя Министерствоен пуктэм ваньбур поттонъя индикаторъёсты быдэстымтэ понна штрафъёслэсь мозмытыны юрттоз. Со сяна, оскон вань, гуртоослы ыштонъёссэс берыктыны федерал бюджетысь ватсаса юрттэт кыскыны луоз шуыса. Ольга Абрамовалэн верамезъя, туннэ нуналлы Удмуртиысь котькуд возёсъя кулэ луись лыдпусъёс люкамын ини. Соосъя 226 гурт предприятиосын 80 сюрс гектарлэсь ятыр муос вылын будосъёс куасьмемын. Соосты кизён-мерттон понна 2,5 миллиард манет кутэмын вал. Али котькуд бусыя, котькут актъя эскеронъёс нуисько на.
Комиссилэн кенешоназ депутатъёс озьы ик гурт возёсэз азинтон сярысь элькун катэ воштонъёсты эскеризы. Соосын кун ласянь юрттэт сётоно ӧръёс пӧлы нимаз возёсъёсты – ЛПХ-осты – пыртыны ӵектэмын. Юрттӥськон амалъёс пусъемын ЛПХ-осты азинтон сярысь элькун катэн. Со туэ 22 южтолэзе кутэмын вал.



Возврат к списку