Алексей Чернов Ижкарысь но Дэри ёросысь калыкез уже интыянъя выль Центре вуылӥз

Туннэ Кун Кенешысь ужъя, мерлыко политикая но ветеранъёслэн ужъёссыя комиссилэн кивалтӥсез Алексей Чернов вуылӥз Ижкарысь но Дэри ёросысь калыкез уже интыянъя выль Центре. Со «Работа в России» федерал бренд улсын усьтэмын. Ужъюрт калыкез уже интыянъя службалэсь Ижкарысь 5 филиалъёссэ но Дэри ёросысь ёзэтсэ огазеяз.
«Демография» йӧскалык проектлэн «Содействие занятости» федерал ӵектосэз улсын центрлэсь юртсэ тупатъян но выльдон ужъёс ортчытэмын.
Центрлэн валтӥсь ужпумез – адямиослы уж шедьтыны луонлыкъёс кылдытон, соослэсь дырзэс шыръян, юрттӥськетъёсты электрон амалъёсы выжтон. Кылсярысь, ужтэк кылем мурт шуыса пусйиськон понна, табере одно ик центре лыктыны кулэ ӧвӧл ини, куриськонэз онлайн амалэн сётыны луоз.
Кун Кенешысь ялан ужась комиссилэн кивалтӥсез выль огазеяськонлэн ужезлы вылӥ дунъет сётӥз, кутскем уж азьланяз быдэс шаере вӧлмытэмын, калыкез уже интыянъя туала сӧзнэт кылдытэмын луоз шуыса оскемзэ вераз. Алексей Чернов нимысьтыз саклык висъяз тазалыкъя сюбегатэм быгатонлыкъёсын адямиослы луонлыкъёс кылдытонлы. Центрын со понна кулэ луись вань куронъёс лыдэ басьтэмын, шуиз со.