Версия для слабовидящих
Спортъя тренеръёслэсь ужзэс катэн радъян лэчыт ужпумъёсты эскеризы

Спортъя тренеръёслэсь ужзэс катэн радъян лэчыт ужпумъёсты эскеризы

26.02.2021
Спортъя тренеръёслэсь ужзэс катэн радъян лэчыт ужпумъёсты эскеризы
Кун Кенешысь физкультурая, спортъя но егитъёсын ужан политикая ӧрилэн кивалтӥсез Иван Черезов спортъя тренеръёслэсь ужзэс катэн радъян ужпумъёслы сӥзем кенешон ортчытӥз. Вераськонэ пыриськизы Кун Думаысь дышетонъя но наукая Комитетлэн ёзчиез, депутат Алексей Загребин, Кун Кенешысь наукая, дышетонъя, культурая, туризмъя но йӧскалык политикая ялан ужась ӧрилэн кивалтӥсезлэн воштӥсез Пётр Басов, Элькунысь физкультурая, спортъя но егитъёсын ужан политикая, дышетонъя но наукая Министерствоосысь ӧнерчиос, Удмуртиысь огазеям командаосты дасянъя спорт центрын ужасьёс.
Иван Черезов тодэ вайытӥз, 16 тулыспалэ Россиысь Кун Дума нырысетӥ лыдӟемен федерал катлэсь ӵектоссэ кутӥз, кудӥзъя тренеръёс педагогика удысын ужасьёс пӧлы пыртэмын луозы. Пиналъёсты спортлы дасянъя огазеяськонъёс спорт удысъя ватсаса тодон-валан сётӥсь огазеяськонъёс шуыса лыдъяськозы. Тренеръёслэн дышетӥсьёслэн кадь, спортсменъёслэн – дышетскисьёслэн кадь гарантиоссы кылдозы. Соин ӵош тренеръёслы чаклам азьвылъёсыз тыронъёс но юрттӥськетъёс утиськозы.
Со сяна, катӵектос дышетон удысын спортъя стандартъёсты юнматонэз чакла. Соосты Россиысь спортъя министерство дасяны кулэ.
Кун Думаысь депутат Алексей Загребин пусйиз, выль кат спортъя тренерлэсь инлыксэ но табышъёссэ ӝутон понна чакламын. Но туннэ сое быдэсъянъя уно юанъёс вань на. Нырысетӥ лыдӟемен юнматыса, катлэсь огъя инъетсэ, солэсь кулэлыксэ пусйиськом, валэктӥз со. Ӵектос али вань улосъёслы лэзьямын. Вуоно лыдӟонъёслы тупатъянъёс но воштонъёс пыртонъя ӵектонъёсты возьмаськом, вераз депутат.
Катӵектос бордын уж азьланьтӥське Кун Думаысь Комитетъёсын но. Парламентарийёсты сюлмаськытэ, выль законлэсь куд-ог куронъёссэ быдэсъян улосвылъёслэсь ватсаса коньдонзэс кулэ кароз шуыса. Кылсярысь, улосвыл но муниципал бюджетъёс вылэ усьыны быгатозы огазеяськонъёслэсь тӥрлыкен базазэс юнматон, капчиятонъёс сётон но компенсациос тырон ужпумъёс. Соин ик воштӥськонъёсты Россилэн куд-ог улосвылъёсаз нырысь эскерон сямен ортчытыны ӵекто.
Удмуртиысь элькун министерствоосысь ӧнерчиос катӵектосъя асьсэлэсь юанъёссэс шараязы. Элькун коньдэтысь тросгес уксёез кыскем сяна, со спортъя огазеям командаослэсь тренеръёссэс но тренер-преподавательёсты табышъёсъя пӧртэм пагӟаосы пуктыны быгатоз. Нырысетӥосызлэн луонлыкъёссы ӧжытгес кылёзы. Бадӟымгес саклык висъяны куремын дышетон удысэ выжтоно тренеръёслэсь тодон-валанъёссэс будэтон ужрадъёслы. Нош валтӥсез сюлмаськон – уз уськытэ-а воштӥськонъёс тренеръёслэсь ужъемышсылэсь ӟечлыксэ?
Кенешонын чузъяськем вань ӵектонъёс но дэмланъёс Кун Думае ыстэмын луозы.

Возврат к списку