Вавож ёросын тол гурт шудонъёслы куасэн бызьылонъя выль огъет усьтӥськиз

Кун Кенешлэн Тӧроез Владимир Невоструев но физкультурая, спортъя но егитъёсын ужан политикая ӧрилэн кивалтӥсез Иван Черезов Вавож ёросысь Нюрдор-Котья гуртын куасэн бызьылонъя «Жемчужина Удмуртии» огъетэз усьтон ужрадэ пыриськизы. Ӵектослэн кичӧлтӥсез но инвесторез – Кун Кенешлэн депутатэз, «Колос» колхозлэн кивалтӥсез Владимир Красильников.
Владимир Невоструев оскемзэ вераз, выль огъет эшшо но тросгес калыкез спортэн эшъяськытоз щуыса. Со пусйиз, Владимир Красильниковен кивалтоно предприятие бадӟым уж нуэ гуртын огъя улон ӟечлыкез ӝутон ласянь. «Колос» возёслэн кужыменыз лэсьтэмын нылпи сад, школа, шутэтскон но тазалыкез юнматон центр.
Куасэн бызьылонъя выль огъетэз усьтон ужрадын люкаськемъёсты спорт удысысь тодмо улосчиосмы – Тамара Тихонова, Владимир Никитин, Максим Вылегжанин, Иван Черезов но элькунысь физкультурая, спортъя но егитъёсын ужан политикая министр Александр Варшавский - ӟечкылазы.
Огъетэз лэсьтон мытэмын вал 2020 арын гужем. Отчы 1,4 иськем кузьдалаен но 5 м пасьталаен лыжероллер трасса, кылиськон-дӥсяськон висъетъёсын, судьяослы комнатаен но буфетэн административной юрт пыро. Куасэн бызьылонъя сюреслы кыкетӥ категория сётэмын. Со возьматэ, отын ортчись ӵошатсконъёсы пыриськем муртлы спортъя мастере кандидат ним сётэмын луыны быгатоз шуыса. Огъетэз лэсьтонэ 17 миллион манетлэсь ятыр коньдон понэмын.
Сӥё-дано усьтон бере, выль сюрес вылын Удмурт Элькунлэн куасэн бызьылонъя Чемпионатэзлэн но Первенствоезлэн куинетӥ люкетсы ортчиз. Отчы 190-лэсь ятыр спортсменъёс пыриськизы. Отын ик бызьылозы XXVII
Элькун тол гурт шудонъёсы пыриськисьёс. Ӵошатсконъёс Вавож ёросын 2020 арын 24-тӥысен 27 тулыспалозь ортчозы.