Удмурт Элькунлэн Кункатаз пыртыны ӵектэм воштонъёс эскеремын

Кун Кенешлэн Тӧроезлэн воштӥсез Александр Прозоров 2 тулыспалэ кунэз лэсьтонъя, интыысь аскивалтонъя но кышкыттэмлыкъя ялан ужась комиссилэсь кенешонзэ ортчытӥз. Депутатъёс Удмурт Элькунлэн Кункатаз пыртыны ӵектэм воштонъёсты эскеризы. Соос Россилэн Конституцияз пыртэм воштонъёсын герӟаськемын.
Ӵектосъя гурт возёс, егитъёсын ужан политика, эмъюрттэт сётон, тазалыко улон сямъёсты азинтон, нылкышно но воргорон семья кусыпъёсты утён, нылпиосты будэтыны луонлыкъёс кылдытон ужпумъёсты Удмурт Элькун Росси Федерациен ӵош быдэсъяны кулэ.
Удмуртилэн валтӥсь катысьтыз Конституционной Судлэн инлыкез, сое кылдытон но ужатон сярысь положениосты утялтыны ӵектэмын. Кылем арын кутэм федерал законъя, Россилэн улосвылъёсысьтыз конституционной судъёс 2023 арозь быдтылэмын луыны кулэ.
Кун Кенеш но Удмурт Элькунлэн Тӧроез соглаш луэмзэс верано уз луэ ини Россиысь Валтӥсь прокурорлэн элькунлы прокуроре ӵектэм кандидатураеныз. Табере улосвыл прокуроръёсты Федераци Кенешен огкылэ вуыса юнмато. Нош ужзылэсь Росси Федерацилэн Азьмуртэз мозмытэ.
Воштӥськонъёс ӵектӥсько интыысь аскивалтон ёзъёсты радъянэ. Соосты кылдытонэ табере кун тӧрлык ёзъёс но пыриськыны быгатозы. Пусйисько интыосысь аскивалтонэз кун тӧрлык ёзъёсын ӵош кунэн кивалтон огъя сӧзнэтэ пыртон ужпумъёс.
Воштӥськонъёс вань Удмурт Элькунлы Тӧрое но Кун Кенеше депутатэ кандидатъёс азе пуктӥськись куронъёсын. Соос ялан Росси Федерациын улыны кулэ. Мукет кунъёслэн кунмуртъёссы луыны уг быгато.
Комиссилэн кенешоназ мукет ужпумъёс но сэрттэмын-пертчемын.