Владимир Невоструев Башкортостанысь удмуртъёслэн культурая центренызы кема аръёс ӵоже кивалтэм Ренат Галямшин улонысь кошкемен валче куректэмзэ вераз

Туннэ Башкортостанысь Татышлы ёросын Ренат Галямшинэн люкисько. Со Башкотостанысь удмуртъёслэсь элькун огазеяськонзэс кылдытӥз но кема аръёс ӵоже соин кивалтӥз. Ренат Галямшин кулӥз 2020 арын 8 шуркынмонэ, кема висемез бере. Удмуртиысь Кун Кенешлэн Тӧроез Владимир Невоструев азьветлӥсьлэн улонысь кошкемез пумысен солэн матысь ӵыжы-выжыосызлы но вань удмурт диаспоралы мур куректэмзэ вераз.
«Удмуртия понна со азьветлӥсь, вордӥськем музъемзэ яратӥсь но выжыоссэ гажась мурт сямен тодмо кылёз. Аслаз уженыз Ренат Биктимирович калыкъёс куспын эшъяськонэз, валче ужанэз кужмоятӥз, трос лэсьтӥз Башкортостанын удмурт кылэз но культураез утён но азинтон понна», - шуэмын телеграммаын.