Удмуртиын йӧскалык печатьлэн нуналэз юнматэмын луыны быгатоз

Туннэ Татьяна Ишматовалэн кивалтэмез улсын наукая, дышетонъя, культурая, йӧскалык нор егитъёсын ужан политикая но спортъя ялан ужась комиссилэн кенешонэз ортчиз. Депутатъёс «Удмурт Элькунлэн праздник нуналъёсыз но буре ваён нуналъёсыз сярысь» катӵектосэ вуэм ӵектонъёсты эскеризы. Проект нырысетӥ лыдӟемен юнматэмын вал Кун Кенешлэн 2020 арын 27 коньывуонэ ортчем сессияз.
Депутатъёс огкылысь дурбасьтӥзы праздник нуналъёс пӧлы йӧскалык печатьлэсь нуналзэ пыртыны. Со – 4 тулыспал. Со нуналэ удмурт кылын нырысетӥез «Войнаысь ивор» газет потыны кутске. Туннэ со «Удмурт дунне» нимын печатлаське.
Умоен лыдъямын буре ваён нуналъёс пӧлы ньыль удмурт азьветлӥсьёслэсь вордӥськем нуналъёссэс пыртыны. Со:
- 29 толшор – удмурт гожъясьлэн, кылбурчилэн, югдытӥсьлэн, кылысь кылэ берыктӥсьлэн Максим Прокопьевич Прокопьевлэн вордӥськем нуналыз;
- 18 гудырикошкон – тодмо крезьгурчилэн, удмурт крезьгур искусстволы инъет кылдытӥсьлэн Геннадий Михайлович Корепанов-Камскийлэн вордӥськем нуналыз;
- 17 куарусён – нылкышно кавалеристлэн, Ӟуч императорской армилэн офицерезлэн, 1812 арын Атыкай оже пыриськем Надежда Андреевна Дуровалэн вордӥськем нуналыз;
- 18 куарусён – кун ужасьлэн, РСФСР-лэн калык комиссарезлэн Иосиф Алексеевич Наговицынлэн вордӥськем нуналыз.
Та воштонъёс юнматэмын луизы ке, «Удмурт Элькунлэн праздник нуналъёсыз но буре ваён нуналъёсыз сярысь» катын 18 буре ваён но 14 праздник нуналъёс пусъемын луозы.
Катӵектос быдэсак эскеремын луоз Кун Кенешлэн 24 шуркынмонэ ортчоно сессияз.
Комиссилэн кеншоназ озьы ик элькунлэн 2021 но вуоно 2022 но 2023 аръёслы бюджетэзлэн ӵектосэз эскеремын.