Наукая, дышетонъя, культурая, йӧскалык но егитъёсын ужан политикая но спортъя ялан ужась ӧрилэн кенешонэз ортчиз

Туннэ наукая, дышетонъя, культурая, йӧскалык но егитъёсын ужан политикая но спортъя ялан ужась ӧрилэн кенешонэз ортчиз. Сое комиссилэн кивалтӥсез Татьяна Ишматова нуиз. Депутатъёс начальной школаын дышетскись пиналъёсты пӧсь сиёнэн дунтэк сюдонэз катэн радъян ужпумез эскеризы.
Росси Азьмуртлэн косэмезъя, туэ дышетскон арысен 1-тӥысен 4-тӥ классозь вань пиналъёсты школаын пӧсь сиёнэн дунтэк сюдыны кулэ. Соин валче Удмуртилэн дышетон удысысь ужоскетъёсты быдэсъян сярысь катаз воштонъёс пыртыны кулэ. Отчы выль ёзэт ватсаське. Соя кун но муниципал дышетсконниосысь начальной классъёсы ветлӥсь нылпиослы нуналаз одӥг пол пӧсь сиён сётӥське. Коньдон элькун но интыосысь бюджетъёсысь, озьы ик росси катрадлыкен чаклам мукет интыосысь висъяське.
Комиссилэн кенешоназ озьы ик «Праздник нуналъёс но буре ваён дырпусъёс сярысь» катӵектос эскеремын. Соя Удмуртиын 14 праздник нуналъёс но сомында ик буре ваён дырпусъёс юнматӥсько. «Катӵектосэз кутэм бере нимысьтыз комиссия кылдытэмын луоз. Депутатъёслэн кыкетӥ лыдӟонлы ини тупатъянъёссы кылдыны быгатозы, праздник но буре ваён нуналъёс уногес луыны быгатозы», - шуиз Татьяна Ишматова.
Ялан ужась ӧри катӵектосэз Кун Кенешлы учкыны но сое нырысетӥ лыдӟемен кутыны дэмлаз.