Версия для слабовидящих
Владимир Невоструев: дунтэк юридик юрттэт басьтыны быгатӥсь муртъёслэсь категоризэс паськытатоно

Владимир Невоструев: дунтэк юридик юрттэт басьтыны быгатӥсь муртъёслэсь категоризэс паськытатоно

09.09.2020
Владимир Невоструев: дунтэк юридик юрттэт басьтыны быгатӥсь муртъёслэсь категоризэс паськытатоно
Удмуртилэн Кун Кенешезлэн Тӧроез Владимир Невоструев калыклы дунтэк юридик юрттэт сётон ужпумъёслы сӥзем кенешон ортчытӥз. Вераськон видеоконференция амалэн радъяськиз.
Дунтэк юридик юрттэт сётон сӧзнэтлэн ужамез сярысь ивортон лэсьтӥз миръясь судьяослэсь ужзэс радъянъя Элькун Кивалтэт бордысь Управленилэн кивалтӥсез Айваз Марданшин. Солэн верамезъя, туннэ юридик юрттэтэз дунтэк басьтыны луонлыксы вань куанер улӥсь муртъёслэн, I но II группаысь сӧсыръёслэн, Быдӟым Атыкай ожысь ветеранъёслэн, Росси Федерациысь но Совето Союзысь, озьы ик ужысь Геройёслэн, сӧсыр нылпиослэн, анай-атайтэк кылем пиналъёслэн, мерлык юрттэт сётон юртъёсын улӥсь арлыдоослэн но сӧсыръёслэн но мукет кунмуртъёслэн. Ваньзэ-ӧвӧлзэ элькун катын 15 категория пусъемын (федерал законын - 12).
Ӵемгес адямиос вазисько улон интылы эрикрадэз пусъёнэн, коммунальной юрттӥськетъёсты басьтонэн, анай яке атай луэмез юнматонэн, алиментъёсты тыронэн, пенсиосты лыдъянэн герӟаськем юанъёсын.
Айваз Марданшинлэн верамезъя, 2018 арын юрттэт курыса 92552 мурт вазиськиз, 2019 арын - 94385, 2020 арлэн нырысетӥ паларез ӵоже -- 44934 адями.
Дунтэк юридик юрттэт сётон сӧзнэтын 49 адвокат ужа, 17-ез соос пӧлысь - Ижкарын.
Кун Кенешлэн Тӧроез пусйиз, элькун бюджетысь та ужпумлы висъяськись коньдон быдэсак уг кутӥськы шуыса. «Юрттэтэз басьтыны быгатӥсь муртъёслэсь категоризэс паськытатоно, - шуиз Владимир Невоструев. - Солы кулэяськись муртъёс туннэ уно, коньдон но вань. Соин ик катрадлыке воштонъёс пыртоно».
Со кунэз лэсьтонъя, интыысь аскивалтонъя но кышкыттэмлыкъя комиссиез воштонъёсты дасян бордын ужаны куриз. Владимир Невоструев вераз Ульяновск улосын радъям уж сярысь. Отын дунтэк юридик юрттэт басьтыны 22 пумо категориосы пырись муртъёс быгато.

Возврат к списку