Агропром огъетья комиссия кудӟытӥсь юонъёсты вузанъя катрадлыке ӵектэм чурытатонъёсты эскериз

Агропром огъетъя, музъем кусыпъёсъя, инкуазез уже кутонъя но утёнъя ялан ужась комиссиысь депутатъёс кудӟытӥсь юонъёсты вузанъя катрадлыке ватсаса чурытатонъёс пыртон сярысь катӵектосэз эскеризы. Со спирто суретъёсты трос квартираё коркаосы усьям калыкез сюдон интыосын вузанэн герӟаськемын. Чурытатонъёс улэ уг сюро 50 квадрат метрлэсь бадӟым залэн ресторанъёс но кафеос.
Тодады вайытом, туэ оштолэзе кутэмын вал трос квартираё улон коркаосы яке соос борды лэсьтэм интыосы усьтэм калыкез сюдон интыосын кудӟытӥсьсэ вузанэз чурытатӥсь федерал кат. Соя 20 квадрат метрлэсь пичи залэн сиськонниосын спирто суретъёсты вузаны уг яра. Улосвылъёслы ватсаса асьсэлэсь куронъёссэс юнматыны луонлык сётӥське.
Агропром огъетъя комиссилэн кивалтӥсез Владимир Варламов пусйиз, элькун катӵектос бордын нимысьтыз группа ужаз, проект пӧртэм эскеронъёс пыр потӥз.
Выль законлэн куронъёсыз улэ нырысь ик Ижкарын ужась предприятиос сюрозы. 120 палаез ворсаськыны быгатозы. Бадӟым люкетэз со – «алдарчи» шуиськись кафеос. Ӵемысь кескич ужбегартӥсьёс пичи вузкароннизэс калыкез сюдон инты шуыса пусъё но отын кудӟытӥсьсэ уй-нунал ӵоже сямен чаркаосы лэзьяса вузало. Таӵе интыос котырын улӥсьёс ӝожтӥсько мултэс куашетэмлы, жуг-жаглы, эрикрадъёсты тӥян учыръёслэн йылэмзылы. Владимир Варламовлэн верамезъя, катэ воштонъёс юнматэмын луизы ке, таӵе заведениослы яке ворсаськоно, яке ужан ӧрзэс воштоно луоз.
Со сяна, катӵектос спирто суретъёсты вузанъя эшшо одӥг курон пуктэ. Соя одӥг интыын кудӟытӥсьсэ яке лэзьяса гинэ, яке ӟенеликъёсын гинэ вузаны луоз. «Со нуназе ужась вузкароннилы ӝытъёсы калыкез сюдон интылы пӧрмыны луонлык уз сёты ини», - валэктӥз комиссилэн кивалтӥсез.
Депутатъёс катӵектосэз умоен лыдъязы. 23 инвожое со Кун Кенешлэн сессияз эскеремын луоз.