Версия для слабовидящих
Депутатъёс Быдӟым Атыкай оже пыриськемъёслы сӥзем синпелетъёсты но буре ваён интыосты тупатъян уже пырисько

Депутатъёс Быдӟым Атыкай оже пыриськемъёслы сӥзем синпелетъёсты но буре ваён интыосты тупатъян уже пырисько

16.03.2020
Депутатъёс Быдӟым Атыкай оже пыриськемъёслы сӥзем синпелетъёсты но буре ваён интыосты тупатъян уже пырисько
Буре ваёнлэн но данлыклэн араз Удмуртиын Быдӟым Атыкай оже пыриськемъёслы сӥзем синпелетъёсты но буре ваён интыосты тупатъян-выльдон уж мынэ. Кызьы вераз Элькун Тӧро дорын ортчем аппарат кенешонын Кун Кенешысь «КПРФ» фракцилэн кивалтӥсез Алексей Конорюков, синпелетъёсты кулэезъя возён со – ож вакытэ улэм, ужам, нюръяськем адямиослы тау карон. «Со уж ялан нуиськыны кулэ», - пусйиз депутат.
Шаерамы 968 буре ваён объект лыдъяське. Соос пӧлысь 33-ез ожгарчиосты ватэм интыос. Огъя туннэ Быдӟым Атыкай ожен герӟаськем 693-ез буре ваён объектъёс тупатъямез кулэ каро.
2019 арын муниципал кылдытэтъёслэн администрациоссы 292 синпелетъёсты но мемориалъёсты тупатъязы. Ужъёслэн огъя быдӟалазы - 7 млн. 108 сюрс манет. Алексей Конорюковлэн верамезъя, коньдон интыосысь бюджетъёсысь висъяськиз, озьы ик грантъёсъя конкурсъёс но программаос пыр вуиз. Сяна, юрттэт висъязы депутатъёс, предприятиос но огазеяськонъёс, ужбергатӥсьёс но огшоры улӥсьёс. «Коньдон бичам сяна, адямиос асьсэос тупатъян ужъёсы но пырисько», - ивортӥз Конорюков.
Кылсярысь, Глазов ёросысь Золотарево гуртын ожгарчиослы сӥзем синпелетэз тупатъяны коньдон поселениысь депутатъёс висъязы, нош ужъёсты гуртысь культура юртын ужасьёс быдэстӥзы.
Вавож ёросын буре ваён интыосты возьыны но выльдыны юрттэт висъяло «Луч», «Горд Октябрь», «Каменный Ключ», «Удмуртия» гурт предприятиос.
Алнаш ёросысь «Ромашкинское» муниципал кылдытэтын улӥсьёс ожын бырем ожгарчиослы обелискез воштыны асьсэлэсь коньдонзэс люказы.
Юкаменск ёрос кенешысь депутат Ильхам Сабреков «Засековское» поселение пырись гуртъёсысь 200-лэсь ятыр ожгарчиослэн нимынызы мемориалэз тупатъяны коньдон висъяз. Яр ёросысь депутат кенешлэн юрттэменыз Озёрки гуртын выль синпелет пуктэмын.
Пичи Пурга ёросын Кун Кенешысь депутатлэн Павел Чушъяловлэн юрттэменыз Кечейыл, Гожня но Пичи Уча гуртъёсын Быдӟым Атыкай оже быремъёслы сӥзем выль обелискъёс пуктэмын. Ужъёслэн огъя дунзы 500 сюрс манетлэсь ятыр.
Глазов но Сарапул каръёсын туннэ нуналлы вань синпелетъёс тупатъямын ини. Уж умой радъямын Дэри, Яр, Шаркан, Кияса но куд-ог мукет ёросъёсын.
Элькунамы выльдэмез возьмась 284 синпелетъёс кылемын на. Алексей Конорюков депутатъёслы но муниципал кылдытэтъёслэн кивалтӥсьёссылы та уже пыриськыны ӧтьыса вазиськиз. Элькун бюджетын коньдон висъямын, но куд-ог ёросъёсын уж кулэезъя радъямын ӧвӧл на, шуиз депутат.
Элькунлэн Тӧроез Александр Бречалов пусйиз, ёрос но кар тӧроосын та ужпумъя рос-прос вераськоно на. Со озьы ик ожысь но ужысь данлыкъя музейёсты азинтон сярысь сюлмаськыны куриз. Туэ инициативной бюджетирования программаын синпелетъёсты но мемориалъёсты тупатъянъя ӵектосъёслы нимысьтыз саклык висъяськоз, оскытӥз Тӧро.


Возврат к списку