Удмуртиын дышетон сярысь катрадлыке ватсанъёс пыртыны но егит дышетӥсьёслы чаклам юрттэтэз басьтӥсь категориосты паськытатыны чаклало

Татьяна Ишматова дышетонъя элькун катрадлыкез тупатъян бордын ужась группалэсь кенешонзэ ортчытӥз. Эскеремын целевой амалэн дышетонэн но егит дышетӥсьёслы юрттэт сётонэн герзаськем ёзэтъёсы воштонъёс.
Татьяна Ишматова тодэ вайытӥз, туннэ Удмуртиысь вылӥ дышетсконниосты йылпумъям но школае лыктэм егит дышетисьёслы нырысетӥ ужан аразы 40 сюрс манет, кыкетӥяз – 60 сюрс но куинетӥ араз 80 сюрс манет тыриське.
Но та юрттэтэз басьтыны уг быгато пиос, кудъёсыз вылӥ дышетсконни бере ик армие кошконо луо, озьы ик нылъёс, кудъёсыз дышетсконзэс йылпумъяку пичи пиналэнызы пуко. Таин валче катэ воштонъёсты ӵекто, кудъёсызъя адямиос, кудъёсыз армия яке декрет отпусксы бере соку ик школае лыктӥзы но со соослэн нырысетӥ ужан интызы луиз, чаклам юрттэтэз басьтыны кутскозы. Одӥг гинэ курон – егит ӧнерчиослы 35 ареслэсь трос медам луы.
Со сяна, наукая но дышетонъя комиссилэн кивалтӥсез ӵектӥз кун ласянь юрттэт сётоно ӧнеръёсты паськытатыны. Гурт школаосын, кылсярысь, туннэ уг тырмо логопедъёс но дефектологъёс. Та удысэ ӧнерчиосты кун юрттэмен дасяны умой луысал, лыдъя Татьяна Ишматова.