Версия для слабовидящих
Пудо-животэз но пӧйшуръёсты вӧсь каремлэсь утён сярысь федерал катэз быдэсъян ужпумъёсты эскеризы

Пудо-животэз но пӧйшуръёсты вӧсь каремлэсь утён сярысь федерал катэз быдэсъян ужпумъёсты эскеризы

30.01.2020
Пудо-животэз но пӧйшуръёсты вӧсь каремлэсь утён сярысь федерал катэз быдэсъян ужпумъёсты эскеризы
Пудо-животэз но пӧйшуръёсты вӧсь каремлэсь утён сярысь («Об ответственном обращении с животными и о внесении изменений в отдельные законодательные акты Российской Федерации») федерал катэз Кун Дума 2018 арын толсур толэзе юнматӥз. Но солэн куд-ог куронъёсыз ужаны кутскизы 2020 арын 1 толшорысен. Кызьы вераз агропром огъетъя, музъем кусыпъёсъя, инкуазез уже кутонъя но сое утёнъя ялан ужась ӧрилэн кивалтӥсез Владимир Варламов, кат пӧйшуръёсты но пудо-животэз возён удысысь кусыпъёсты радъя, адямиосты но, лулосъёсты но вӧсь луонлэсь утёнэз чакла.
Удмуртиысь ветеринарияя Валтӥсь управленилэн кивалтӥсез Роман Габдрахманов пусйиз, катъя та арысен уг яра кышкыт выжыысь пуныосты намордниктэк поттаны, йӧтылыны луоно зоопаркъёсты возьыны, озьы ик кыр пӧйшуръёсты дорын возьыны. Ужаны кутскиз приютъёслэсь ужзэс радъясь ёзэт. Соя приютъёслэн кузёоссы азе пудо-животъёслэн кузёоссылы кадь ик куронъёс пуктӥсько. Со сяна, 1-тӥ толшорысен кужымаз пыре программа, кудӥзъя калгись пудоез кутылыны, сузяны, вакцинировать карыны но азьвыл интыяз ик берыктыны гинэ луэ. Со бере пудо борды басьяськисьтэм нимысьтыз пус юнматӥське. Калгись пудоез кутон но берен ас интыяз лэзён видеое гожтэмын луыны кулэ. Кузёоссы сярысь иворъёсын (кылсярысь, биркаосын) пудо-животъёсты кутылыны уг яра. Пудоосты но пӧйшуръёсты виылыны уг яра. Кат сыӵе луонлык сётэ пудо йӧнатыны луонтэм секыт висёнэн курадӟыку гинэ.
Ветеринарияя Валтӥсь управление элькун министерствоосын но муниципал огазеяськонъёслэн Кенешенызы ӵош катэз быдэсъянъя дорожной карта дасяз. Со 2020-тӥ 2023-тӥ аръёслы чакламын. Валтӥсь ужрадъёс пӧлын – уже кутӥськисьтэм юртъёсты пусъён, азьланяз соосты приютъёслы шуыса тупатъян, озьы ик приютъёс лэсьтон понна музъем висъян.
Катэз быдэсъян понна кулэ луись нормативной база Удмуртиын дасяны кутскемын ини. Дасямын катӵектос, кудӥз калгись пудо-животэз кутылонъя но возёнъя элькун катэз федерал законлэн куронъёсызлы тупатэ. Та ужез быдэсъяны кулэ луись субвенциосты лыдъян-чотанъя выль радлык тупатӥське. Матысь дыре катӵектос Кун Кенеше вуыны кулэ.
Элькун Кивалтэт приютъёслэсь ужзэс радъянъя Пуктэт дася. Со пудо-животъёсты басьтон, интыян, сюдон, эмъян ласянь куронъёсты но радлыкез юнматэ. Али шаерамы пудо-животъёслы чаклам кык приют ужа. Одӥгез со – «Кот и пёс» - интыяськемын Ижкарын, мукетыз – «Надежда» - Глазкарын. Кыкез но огазеяськонъёс нимаз кузёослэн луо. Муниципал но кун приютъёс Удмуртиын ӧвӧл. Но калгись пудоез кутылон, сузян но висёнъёслэсь утён программалэсь куронъёссэ быдэсъязы ке, нимаз кузёослэн но приютъёссы кун субсидиос басьтыны быгатозы, валэктӥз Роман Габдрахманов.
Ялан ужась комиссилэн кивалтӥсез Владимир Варламов управлениез кат бордын ужез ӝоггес быдэстыны куриз. Со понна Кун Кенеш кулэ юрттэт сётыны дась, пусйиз со.


Возврат к списку