Версия для слабовидящих
Удмуртиын "Большой ремонт" азьланьтӥське

Удмуртиын "Большой ремонт" азьланьтӥське

11.01.2020
Удмуртиын "Большой ремонт" азьланьтӥське
Кун Кенешлэн Тӧроезлэн Нырысетӥ воштӥсез, кышкыттэмлыкъя, Регламентъя но Кун Кенешлэсь ужзэ радъянъя ялан ужась ӧрилэн кивалтӥсез Владимир Невоструев 10 толшоре Элькунлэн Тӧроеныз Александр Бречаловен ӵош Яр но Юкаменск ёросъёсы вуылӥз. Та муниципал кылдытэтъёс нырысетӥ вице-спикерлэн быръён округаз пыро.
Тӧролэн ужез Яр ёросысь Дизьминоын – Биграгуртын - кутскиз. Шоръёзо школаын со «Образование» йӧскалык проектъя выльдэм спортзалэн тодматскиз. Кызьы вераз школалэн кивалтӥсез Юрий Шандыбин, со 1974-тӥ арын лэсьтэмын. Со дырысен одӥг пол но тупатъямын ӧй вал. Ужъёслы элькун бюджетысь 400 сюрс манетлэсь ятыр коньдон висъямын. Со вӧзы ёрос коньдэтысь пичияк уксё шедиз на. Торгъёс дыръя шыръям коньдонэн спорттӥрлык басьтыны быгатӥзы, «Большой ремонт» программа улсын школалэсь липетсэ выльдӥзы.
Мукетыз бадӟым шумпотон - Биграгуртын хоккеен шудон инты лэсьтӥзы. Сыӵе луонлык кылдӥз «САФМАР» благотворительной фонд юрттэмен. Табере отчы Яр посёлокын улӥсьёс но быдэс семьяен шудыны вуыло. Нылпиосты конькиен нискыланы зэмос тренеръёс дышето. Александр Бречалов пинал хоккеистъёсын вераськиз, нош соос вормонъёссы но азьпала малпанъёссы сярысь веразы. Спорт огъет паськыталоз на. ГТО площадкаен ӵош футболэн шудон инты кылдоз.
Биграгуртъёс Тӧролы культура юрт лэсьтыны чакланъёссы сярысь веразы. Азьвылэз юрт куашкан калэ вуэмын, со 2016 арысен уже уг кутӥськы ини. 2018 арын пӧсьтолэзе гуртын улӥсь Денис Лихачёв Росси Азьмуртлэн Админстрацияз ваньмон дырез ортчытон огъетлэн кулэлыкез сярысь гожтэтэн вазиськиз. Россиысь культурая министерство 2020 арын культурая юрт лэсьтыны субсидия висъян сярысь решение кутӥз. Кулэ ужкагазъёс дасямын но юнматэмын ини.
Со сяна, 2020 арын Яр ёросын выль ФАП лэсьтэмын, ёрос эмъяськоннилэн юртэз тупатъямын луозы. Вань ужъёс мынозы «Здравоохранение» йӧскалык проект улсын.
Александр Бречалов озьы ик " Юкаменскысь шоръёзо школае вуылӥз. Кылем арын солэн кыкетӥ корпусэз «Большой ремонт» программая выльдэмын вал: воштэмын липетэз, 100 укноез, выльдэмын инженер сӧзнэтэз. Школа стадионэ физкультурая но спортъя огъет интыязы. Со ГТО куронъёсты быдэсъяны чакламын.
Таяз арын Юкаменск школа цифра амалэн дышетонъя но гуманитари ӧръёсъя центрлы пӧрмытэмын луоз. Туала тӥрлыкен тырмытэм классъёсын «Технология», «Информатика» но «ОБЖ» предметъёсты дышетозы.
Юкаменское черкогуртын Удмуртилэн Тӧроез пиналъёсын пумиськылӥз. Со понна ёрос центре вань школаосын дышетскисьёс люкаськылӥзы. Александр Бречалов Удмуртиысь дышетон удыслэн азинтӥськонэз сярысь вераз.
Тӧро озьы ик «Засековское» муниципал кылдытэ пыраз, Жувам гуртысь «Инициативное бюджетирование» проект улсын лэсьтэм сюресэз учкиз. Та ӵектосъя уж Удмуртиын туэ но азьланьтэмын луоз, ивортӥз Александр Бречалов.

Возврат к списку