Версия для слабовидящих
Нырысь-валысь эмъюрттэт сётон ужпумъёсты эскеризы Кун Кенешын «котрес ӝӧк сьӧрын» пумиськонын

Нырысь-валысь эмъюрттэт сётон ужпумъёсты эскеризы Кун Кенешын «котрес ӝӧк сьӧрын» пумиськонын

19.12.2019
Нырысь-валысь эмъюрттэт сётон ужпумъёсты эскеризы Кун Кенешын «котрес ӝӧк сьӧрын» пумиськонын
Кун Кенешлэн Тӧроезлэн воштӥсез, тазалыкез утёнъя, семья но демографи политикая ялан ужась ӧрилэн кивалтӥсез Надежда Михайлова нырысь-валысь эмъюрттэт сётон сӧзнэтэз азинтон ужпумъёслы сӥзем кенешон ортчытӥз. «Котрес ӝӧк сьӧрын» вераськонэ пыриськизы Кун Кенешлэн Тӧроез Алексей Прасолов, Элькун Кивалтэтлэн Тӧроезлэн воштӥсез Анастасия Муталенко, Кун Кенешысь «Единая Россия» фракцилэн кивалтӥсез Елена Дербилова, «КПРФ» фракцилэн кивалтӥсез Алексей Конорюков, агропром огъетъя комиссилэн кивалтӥсез Владимир Варламов, ёрос но кар эмъяськонниослэн валтӥсь врачъёссы.
Кызьы вераз Надежда Михайлова, кун тӧрлык азьын сылӥсь валтӥсь ужпум туннэ – эмъюрттэт сётонлэсь ӟечлыксэ но ӝоглыксэ будэтон. Со понна нырысь ик сэрттоно-пертчоно первичное звено шуиськись удыс азьын сылӥсь ужпумъёсты.
Элькун Кивалтэтлэн Тӧроезлэн воштӥсез Анастасия Муталенко верамъя, Удмуртия тазалыкен герӟаськем йӧскалык проектъёсты быдэсъянъя дас устоосыз улосъёс пӧлы пыре. Солы луонлык сётэ интыысь аскивалтон ёзъёсын, валтӥсь врачъёсын валче ужан. «Висёнъёсты алон, диспансеризация со тазалыкез утёнъя министерстволэн гинэ сюлмаськонэз ӧвӧл. Со уже озьы ик пыриськыны кулэ депутатъёс, муниципал тӧрлык, эмъяськонниослэн кивалтӥсьёссы», - шуиз вице-премьер.
Удмуртиысь тазалыкез утёнъя министрлэсь ужзэ быдэсъясь Георгий Щербак пусйиз, шаерамы тазалыкез утёнэн герӟаськем йӧскалык проектъёслэн 6 улосвыл ӵектосъёссы ужало. Со сяна, 2 проект быдэсъяське «Демография» проект улсын. Соосъя та арлы чаклам вань ужъёс быдэстэмын. Элькунамы нырысьсэ кылдӥз санитарной авиация. Солы луыса, уно адямиосты быронлэсь утьыны луиз. Басьтэмын интыысь интые нуллыны луись 8 огъет. Соос кыдёкысь гуртъёсын улӥсьёс доры юрттэт вуттыны быгато. Азьланьтӥське эмъськонниосты но поликлиникаосты туала тӥрлыкен тырмытон. Ува ёрос эмъяськонниын нырысьсэ кылдытэмын сэр висёнъёсъя центр. Отчы матысь ёросъёсын улӥсьёс но вазиськыны быгато. Выль тӥрлык ваемын Элькун онкологи диспансере, али 7 моногородъёсын но ёроскуспо медцентръёсын пыктос висёнъёсъя ёзъёс кылдытон уж мынэ.
Тазалыкез утёнъя министрлэн воштӥсез Мария Галеева пусйиз, Росси Кивалтэт нырысь-валысь эмъюрттэт сётон ёзэз выльдон программаез быдэсъянъя дорожной карта кылдытӥз. Соя улосъёсын та удысын ужась юртъёсты, соослэсь тӥрлыксэс но ужасьёссэс пусйыны кулэ. Со сӧзнэтлэсь тырмымтэоссэ, адямиослэсь кулэяськонъёссэс шараяны юрттоз.
Удмуртиын уж кутскемын ини. Со сяна, шаерамы та удысэз 2024 арозь выльдонъя но азинтонъя программа дасяське. Ӵектосъя, 2024 арозь нырысь-валысь эмъюрттэт сётонъя вань юртъёсын кыӵе ке но ужъёс ортчытэмын луыны кулэ. Соин ӵош фельдшер-акушер пунктъёсы кулэ ужасьёсты кыскыны чакламын. Со понна Ижкарысь эмакадемиын но эмколледжын егитъёсты целевой амалэн дышетонлы бадӟымгес саклык висъяны ӵектӥзы.
«Матысь 4 ар ӵоже эмчиослэн тырмымтэенызы герӟаськем ужпумъёс луыны кулэ вӧл ини, - шуиз Надежда Михайлова. – Сыӵе ужпум пуктӥз аслаз докладаз Удмуртилэн Тӧроез Александр Бречалов. Со туж бадӟым уж, но асьмеос сое быдэстыны кулэ».
Пумиськонын чузъяськем вань ӵектонъёс кенешонлэн резолюцияз пыртэмын луозы.

Возврат к списку