Удмуртиын энергетик юонъёсты быдэ вуымтэослы вузанэз дугдытозы

Кун Кенешлэн дас тямысэтӥ сессияз депутатъёс Удмуртиын энергетик юонъёсты быдэ вуымтэослы вузанэз дугдытон сярысь катэз кутӥзы. Соин ӵош административной кылкутон сярысь катэ воштонъёсты юнматӥзы. Катэз дасяны кичӧлтон сётӥсьёс пӧлын - пиналъёслэн эрикрадъёссыя Удмурт Элькун Тӧро бордын ужась Уполномоченной Ольга Авдеева.
Кызьы вераз Кун Кенешлэн Тӧроезлэн воштӥсез, тазалыкез утёнъя, семья но демографи политикая ялан ужась ӧрилэн кивалтӥсез Надежда Михайлова, та выллем федерал кат али ӧвӧл на, но унояз улосвылъёсын асьсэлэн законъёссы ужало ини.
Энергетик юонъёсын 80-100 миллиграмм кофеинэз вань. Со быдэс нуналлы чаклам эсэплэсь ӧжытгес. Нош пӧртэм стабилизаторъёс но консервантъёс кофеинэз мултэс каро. Со лулсэр сӧзнэтлы но мукет ёзвиослы кышкытлык кылдытэ. Ялан юыса, адямилэн тазалыкез лябӟыны кутске, валэктӥз Надежда Михайлова. Пиналъёс понна тужгес кышкытэз - ёзвиослы кужым сётӥсь юонъёслы мугор наркотикъёслы сямен дышыны быгатэ.
Катэн таӵе юонъёсты быдэ вуымтэослы вузанэз дугдытыны чакламын. Куронъётсы тӥясьёслы 3-ысен 5 сюрс манетозь штраф тупатэмын. Кивалтӥсьёслы тыриськон 15 сюрс манетозь, нош организациослы - 100 сюрс манетозь ӝутэмын. Закон 2020-тӥ арын 1-тӥ толшорысен ужаны кутскоз.