Версия для слабовидящих
Кун Кенешлэн Президиумез вылӥ дунъет сётӥз «Культура» йӧскалык проектлэн Удмуртиын быдэсъяськемезлы

Кун Кенешлэн Президиумез вылӥ дунъет сётӥз «Культура» йӧскалык проектлэн Удмуртиын быдэсъяськемезлы

18.11.2019
Кун Кенешлэн Президиумез вылӥ дунъет сётӥз «Культура» йӧскалык проектлэн Удмуртиын быдэсъяськемезлы
Туннэ Кун Кенешлэн Президиумез «Культура» йӧскалык проектлэсь Удмуртиын быдэсъяськемзэ эскериз. Ужпумъя ивортон лэсьтӥз Элькунысь культурая министр Владимир Соловьёв. Солэн верамезъя, шаерамы йӧскалык проектлэн «Культурная среда», «Творческие люди», «Цифровая культура» ӵектосъёсыз ужало. Соослэн та арлы огъя бюджетсы 55 млн. 740 сюрс манет луиз.
Йӧскалык проект улсын туэ Алнаш, Вавож, Вотка, Дэри, Кез, Сарапул, Ува, Шаркан но Яр ёросъёсысь 9 культура юртъёс выльдэмын. Яр ёросысь Ворца, Дэри ёросысь Якшур гуртъёсысь, Шаркан но Вавож ёросысь Какмож черкогуртъёсысь, Алнаш ёросысь Асан совхоз-техникумысь культура юртъёс туннэ нуналлы усьтэмын ини.
«Какможын буш сылӥсь юртэз тупатъям, - вераз Владимир Соловьёв. – Отчы культурая юртэз но, искусствоосъя школаез но, библиотекаез но интыям. Культурая зэмос центр пӧрмиз».
Али усьтӥськыны дасяське Кез ёрос культура юрт, тупатъян-выльдон мукетъёсаз но юртъёсын йылпумъямын ини. Огъя та ужъёслы 30 млн. 829 сюрс манет кутӥськиз. Со пӧлысь 22 млн. 474 сюрс манетэз со – федерал коньдон, 5 млн. 271 сюрс манетэз – элькун уксё. 3 миллион манетлэсь ятыргес висъязы муниципал коньдэтъёс.
«Творческие люди» но «Цифровая культура» ӵектосъёс улсын 195 ӧнерчиос тодон-валанзэс будэтӥзы Гнесинъёс нимо крезьгуръя Росси академиын. 2021-тӥ арозь дышетонъя программаез паськытатыны чакламын. Та уже пыриськыны дась Пермьысь но Казаньысь культурая кун институтъёс, Саратовысь кун консерватория.
Владимир Соловьев озьы ик ивортӥз, «Культура» йӧскалык проект улсын 34 книга синпелетъёс цифра амалэ выжтэмын, творчествоя 6 фестивальёс ортчытэмын шуыса. Ваньзэ-ӧвӧлзэ культура удыслы федерал бюджетысь 260 миллион манет вуиз. «Вуоно арлы лыдпусъёс йыло, ми чакласьком федерал бюджетысь 300 миллион манет басьтом шуыса. 100 миллион манет кыле на Йӧскалык библиотекалы, 28 миллион манет чакламын выль культура объектлы – егит учкисьлэн театрезлы (ТЮЗ)», - вераз министр. Вуоно арын озьы ик тупатъяськон ужъёс но азьланьтэмын луозы. Гурт культура юртъёслы со понна 73 миллион манет федерал бюджетысь, 12 миллион манет – улосвыл коньдэтысь висъямын луоз.
Кун Кенешысь наукая, дышетонъя, культурая, егитъёсын ужан но йӧскалык политикая но спортъя комиссилэн кивалтӥсез Татьяна Ишматова пусйиз, гуртъёсын культурая юртъёс огъя калыкез огазеясь инты луо шуыса. Соин ик та юртъёсты выльдон ужез азинтоно, лыдъя депутат.
Кун Кенешлэн Тӧроез Алексей Прасолов «Культура» йӧскалык проектлэн шаерамы быдэсъяськемезлы вылӥ дунъет сётӥз. Президиумлэн ёзчиосызлэн нимынызы со министерстволы выль азинсконъёс сӥзиз.

Возврат к списку