Версия для слабовидящих
Элькунлэн Тӧроез Кун Кенешысь депутат фракциослэн кивалтӥсьёсынызы пумиськылӥз

Элькунлэн Тӧроез Кун Кенешысь депутат фракциослэн кивалтӥсьёсынызы пумиськылӥз

22.10.2019
Элькунлэн Тӧроез Кун Кенешысь депутат фракциослэн кивалтӥсьёсынызы пумиськылӥз
Удмуртилэн Тӧроез Александр Бречалов Кун Кенешысь депутат фракциослэн кивалтӥсьёсынызы пумиськылӥз. Вераськон мынӥз элькунлэн азинсконэз но вуоно арлы бюджетэзлэн ӵектосэз сярысь.
«2019-тӥ арлэн валтӥсь тодметэз – кунлэн Азьмуртэныз ӵектэм йӧскалык проектъёсты быдэсъян. Удмуртия та уже мыло-кыдо пыриськыны кутскиз. Коньдон, уката но мерлык удысэ, туж шӧдскымон лыктэ. Вуоно арлы но бадӟымесь ужпумъёс пуктоно. Котькыӵе партие мед пыром, но кылдэм ужпумъёсты сэрттыны-пертчыны но азьланезлы сюресъёсты пусйыны кулэ огазеяськыса но огкылысь», - шуиз Александр Бречалов.
«Единая Россия» партилэн улосвыл ёзэзлэн секретарез, Кун Кенешлэн Тӧроезлэн Нырысетӥ воштӥсез Владимир Невоструев пусйиз, элькунлэсь бюджетсэ кутон азьын таӵе пумиськон нырысьсэ радъяське. 2020-тӥ арын Удмуртия кунлык басьтэм дырысеныз 100 ар тырмонзэ пусъе. Со шаерын улӥсь котькуд адями понна туж дуно лыдпус. Владимир Невоструев сизёнзэ вераз агропром огъетлы юрттэт сётонэз будэтон сярысь. Кылсярысь, школаосын но техникумъёсын механизаторъёсты дасяно, гуртоослы техника но кидыс басьтыны юрттӥськоно, «Устойчивое развитие сельских территорий» программая ужез азьланьтоно. Александр Бречаловлэн верамезъя, кайта агропром огъетлы коньдон 2019 арын мында ик висъяськоз. 2020 арлы Удмуртилэн коньдэтаз гурт удыслы 980 миллион чакламын, 1 млрд 179 млн манет вуыны кулэ федерал бюджетысь.
Алексей Конорюков, КПРФ фракцилэн кивалтӥсез, Быдӟым Атыкай оже пыриськемъёслы сӥзем синпелетъёсты тупатъяны коньдон висъяны ӵектӥз. Элькун Тӧролэн верамезъя, 2020 арын Удмуртия та мугъёслы федерал коньдэтысь 4,9 млн манет басьтоз. Муниципал коньдэтъёсын 376 синпелетъёсты выльдыны 12,3 млн манет чакламын. Со сяна, Удмуртиын ужа инициативной бюджетирования программа. Унояз гуртъёсын улӥсьёс синпелетъёсты со ӵектосъя тупатъяло.
ЛДПР фракцилэн кивалтӥсез Тимур Ягафаров ёросъёсы газ кыскон ужъёсты азьланьтонъя куронъёссэ шараяз. Та дыре газификацилэн быдӟалаез шаерамы 58,98%. Ар пумозь 250 иськем газ гумыос кыскемын луозы, вуоно арын – 400 иськем пала. Трос нылпиё семьяос понна газ кыскон ужъёс нуисько нимысьтыз программая. Соя ог 70 млн манет висъя Газпром огазеяськон.
«Справедливая Россия» фракцилэн кивалтӥсез Фарид Юнусов шаерамы эмъюм турынъёсты дасян ужез улӟытыны ӵектӥз. Озьы ик жилищно-коммунальной юрттӥськетъёслы дунъёс сярысь юан сётӥз. Кызьы вераз Александр Бречалов, Ижкарын ЖКХ-лы дунъёс Приволжск федерал округын тужгес ичиосыз пӧлын. Коньдэтын адямиослы коммунальной юрттӥськетъёслы субсидиос тырон понна уксё чакламын.
Елена Дербилова, «Единая Россия» фракцилэн кивалтӥсез, Олимпи чемпионкалэсь Галина Кулаковалэсь ӵектонзэ шараяз. Со герӟаськемын Дэри ёросысь Италмас школалы стадион лэсьтонэн. Озьы ик со интернет герӟетэз гурт школаосы вуттон понна коньдон висъяны ӵектӥз.
Удмуртилэн Тӧроез парламентарийёслы тау кариз. Огкылысь ужаса, выль луонлыкъёс но коньдон поттон выль амалъёс шедьтыны быгатом», - пусйиз Александр Бречалов.


Возврат к списку