15 коньывуон – Удмуртилэсь нырысетӥ Азьмуртсэ Александр Волковез буре ваён нунал

Туннэ, 15-тӥ коньывуонэ, Удмуртиын буре ваизы элькунлэсь нырысетӥ Азьмуртсэ. 2000-тӥ арын ӵапак та нуналэ Александр Волков Удмуртилы Азьмуртэ быръемын вал. Та ужын со тыршиз 2014-тӥ арлэн тулыспал толэзёзяз. 2017-тӥ арын куартолэзе Александр Волков улонысь кошкиз. Ар талэсь азьло солэн шайвылаз синпелет усьтэмын вал. Туннэ со синпелет доры ӵыжы-выжыосыз, ӵош ужам эшъёсыз, огшоры улӥсьёс люкаськылӥзы.
«Та нуналэз праздникез сямен пусйыны луоно, - пусйиз Кун Кенешлэн Тӧроез Алексей Прасолов. – Нырысетӥ Азьмуртэз быръемен ӵош Удмуртилэн улоназ ӝог азинскон вакыт кутскиз. Со понна трос лэсьтӥз Александр Волков. Со котыраз бадӟым ужась команда люказ. Яратӥз но гажаз эшъёссэ, дунъяны быгатӥз соослэсь тыршемзэс».
Кун Кенешысь депутат, Удмуртилэн нырысетӥ Азьмуртэзлэн пиез Андрей Волков, люкаськемъёслы тау карыса, 15-тӥ коньывуонэз Александр Волковез буре ваён нуналэн лыдъяны ӵектӥз. «Та нуналэз со туж яратӥз, котьку пусйылӥз сое», - шуиз Андрей Волков.
Туннэ ик Кузебай Герд нимо Йӧскалык музейын Александр Волковлы сӥзем «Под личную ответственность» нимо адӟытон усьтӥськиз. Та арысен со ялан ужась каремын. Адӟытон нырысетӥ Азьмуртлэн тодэ ваёнъёсыз пыр Удмуртилэсь туала историзэ возьматэ.