Версия для слабовидящих
«Удмуртия» книгапоттонни дауръем юбилейзэ пусйиз

«Удмуртия» книгапоттонни дауръем юбилейзэ пусйиз

26.09.2019
«Удмуртия» книгапоттонни дауръем юбилейзэ пусйиз
Туннэ Кун Кенешын «Удмуртия» книгапоттоннилэн 100 ар тырмонэзлы сӥзем сӥё-дано ужрад ортчиз. Отчы пыриськизы Кун Кенешлэн Тӧроез Алексей Прасолов, наукая, дышетонъя, культурая, егитъёсын ужан но йӧскалык политикая но спортъя ялан ужась комиссилэн кивалтӥсез Татьяна Ишматова, Кун Кенешысь депутатъёс, Элькун Кивалтэтлэн ёзчиосыз, Удмуртилэн Дано кунмуртъёсыз, издательствоысь ужасьёс но ветеранъёс но мукет куноос.
«Сю ар со – быдэс вапум, шуиз Алексей Прасолов, люкаськемъёсты ӟечкыласа. – Та дыр ӵоже 91 миллион книга поттэмын. Россия понна туж секыт вакытъёсы но тӥ уждэс куспетӥ ӧд каре. Быдӟым Атыкай ож аръёсы адямиос доры кулэ иворъёсты вуттӥды. 12 сюрс пӧртэм книгаос пӧлысь одӥгез тужгес пусйымонэз книга – Удмурт Элькунлэн 2000-тӥ арын поттэм энциклопедиез. Со – Россиысь нырысетӥез улосвыл энциклопедия. Тау тӥледлы!»
Кун Кенешлэн тӧроез книгапоттоннилэн кивалтӥсезлы Юрий Кузнецовлы ӟечкылан гожтэт сётӥз. Издательствоысь устоосыз ужасьёс данъетъёсын пусъемын.
«Удмуртия» издательствоез но Удмуртиын книга поттон ужез кутскисьёсты сӥлы карыса, тодмо удмурт югдытӥсьлэн, кылбурчилэн но мерлыко ужасьлэн Кузебай Гердлэн синпелетэз доры сяська понӥзы.

Возврат к списку