Кун Кенешын дышетӥсьёсты мултэс кагазъёслэсь но отчётъёслэсь мозмытон ужпумъёсты эскеризы

Кун Кенешын «Антибюрократическая учительская инициатива» шуыса нимам котрес ӝӧк сьӧрын вераськон ортчиз. «Единая Россия» фракциен но партилэн улосвыл ёзэныз радъям кенешонэ Кун Кенешысь депутатъёс, дышетсконниослэн кивалтӥсьёссы, дышетонъя но наукая министерствоысь но мукет ёзъёсысь ӧнерчиос пыриськизы.
Кызьы верало школаослэн кивалтӥсьёссы, кагаз уж йылэ, нош нылпиосын ужаны дыр ӧжытгес кыле. Школаос пӧртэм ведомствоос азьын дышетон, визьнодан, ваньбурен кузёяськон ужпумъёсъя валэктонъёс гожъяно луо. Выль куронъёс потэмен, эшшо тросгес отчётъёс лэсьтоно луэ. Ӵемысь мерлыко вотэсъёсы интыям шара ивортонэз но кӧня ке ёзъёсы нимысьтыз электрон амалэн но, кагаз вылын но лэзьяны косо на.
Кенешонын озьы ик ӝутэмын вал дышетсконниосын эскеронъёсты ортчытъян, пиналъёсты нырысетӥ классэ басьтон ужпумъёс. Кун Кенешысь наукая, дышетонъя, культурая, егитъёсын ужан но йӧскалык политикая но спортъя ялан ужась комиссилэн кивалтӥсез, «Новая школа» проектлэн координаторез Татьяна Ишматова та ласянь нимысьтыз удыскуспо ӧри кылдытыны ӵектӥз. Кивалтэтысь но Кун Кенешысь ӧнерчиос сяна, отчы пырыны кулэ эскеронъёсты ортчытъясь ёзъёсын но ужасьёс.
Кенешонэз нуись, Кун Кенешысь кунэз лэсьтонъя но интыысь аскивалтонъя комиссилэн кивалтӥсез Александр Прозоров соглаш кариськиз, унозэ ужпумъёсты интыосын ик сэрттыны-пертчыны луэ шуыса. Та ласянь ӵектонъёсты дышетонъя но информатизацияя элькун министерствоосы келялом, вераз со. «Прокуратураез но уже кыском, - шуиз депутат. – Чаклано, вал-а зэмзэ но сыӵе учыръёс, куке одӥг дышетсконниын арня ӵоже 8 пӧртэм ёзъёслэн эскеронъёссы ортчылӥзы».
Пумиськонын чузъяськем ӵектонъёс «Единая Россия» партилэн Валтӥсь быдэсъясь комитетаз келямын луозы. Азьланяз соосты партилэн «Благополучие человека» площадкаяз эскерозы.