Версия для слабовидящих
Надежда Михайлова пресс-конференция ортчытӥз

Надежда Михайлова пресс-конференция ортчытӥз

04.04.2019
Надежда Михайлова пресс-конференция ортчытӥз
Кун Кенешлэн Тӧроезлэн воштӥсез, тазалыкез утёнъя, демографи но семья политикая ялан ужась ӧрилэн кивалтисез Надежда Михайлова иворъёсты вӧлмытон ёзъёсын ужасьёсын пумиськылӥз. Со ӧрилэн быдэстэм ужъёсыз но азьланезлы чакланъёсыз сярысь вераз.
2018-тӥ арлэн пумаз – 2019-тӥ арлэн кутсконаз юнматэм ужпумъёс пӧлысь со нимысьтыз висъяз спирто суретъёсты вузанъя куронъёсты тӥям понна кылкутонэн герӟаськем кык кичӧлтонъёсты. Соосты али Кун Дума эскере. Урод сямъёсын нюръяськонэз кужмоятонъя катъёс кутэмын элькунамы но. 2019-тӥ арын тулыспал толэзе Кун Кенеш быдэ вуымтэосты кальян, вейпъёс но электрон сигаретъёс кыскон интыосы пыраны лэзисьтэм катэз юнматӥз. Солы вылӥ дунъет сётӥз пиналъёслэн эрикрадъёссыя Росси Азьмурт бордын ужась Уполномоченной Анна Кузнецова. Удмуртиын выллем катэз со мукет улосъёсын но кутыны ӵектӥз.
Южтолэзе ортчем сессиын депутатъёс «Куд-ог каттӥянъёс понна кылкутон сярысь» катэ воштонъёс пыртӥзы. Соосъя кун тӧрлык но интыосысь аскивалтон ёзъёсы, вузкарон, калыкез сюдон, бытовой юрттӥськет сётон юртъёсы пыронлэсь 5 метрлы матын тамак кыскыны уг яра. Ӵындыны лэземын ӧвӧл калыкез нуись-ваись транспорт дугдылонниосын но соослэсь 5 метрлы матын, калыко ужрадъёсты ортчытон интыосын. Куронъёсты нырысетӥзэ тӥям понна сюрс манет, выльысен сюремъёслы - 2 сюрс манет штраф чакламын.
Али Элькунысьтымы парламентарийёс Россиысь Кун Думае выль вазиськон дасяло. Соос быдэ вуымтэ нылпиослэн тамак кыскемзы понна анай-атайёсты тыриськон улэ кыскыны дэмлало. «Проектэз эскерыку, пӧртэм малпанъёс чузъяськизы, - шуиз Надежда Михайлова. - Угось, тыриськон семья понна ватсаса шуг-секытъёс кылдытыны быгатоз. Но уноезгес депутатъёс выльдӥськонъёс понна дурбасьтӥзы. Нылпиосты визьнодан но соослэсь тазалыксэс утён понна нырысь ик кылкутыны кулэ анай-атайёс». Вазиськон Кун Кенешлэн матысь сессияз эскеремын луоз.

Возврат к списку