Версия для слабовидящих
Кун Кенешлэн Тӧроезлэн нырысетӥ воштӥсез Владимир Невоструев радиокылзӥсьёслэн юанъёссылы валэктонъёс сётӥз

Кун Кенешлэн Тӧроезлэн нырысетӥ воштӥсез Владимир Невоструев радиокылзӥсьёслэн юанъёссылы валэктонъёс сётӥз

20.03.2019
Туннэ Кун Кенешлэн Тӧроезлэн нырысетӥ воштӥсез Владимир Невоструев «Мынам Удмуртие» радиолэн меӵак эфираз мынӥсь радиовераназ пыриськиз. Пумиськон сӥземын вал Росси Азьмуртлэн Посланияз пусъем ужрадъёсты шаерамы быдэсъян ужпумъёслы.
Та ласянь Удмуртиысь Кун Кенеш нимысьтыз План юнматӥз. Отчы кӧня ке катӵектосъёс кылдытон, пӧртэм пумиськонъёс, «котырес ӝӧк сьӧрын» вераськонъёс пыртэмын. Удмуртиысь парламент озьы ик тыро-пыдо ужа федерал катрадлыке воштонъёс ӵектонъя. Вуоно арня ӵоже шаерамы ужалозы Кун Думалэн Удмуртиысь депутатъёсыз. Владимир Невоструевлэн верамезъя, соосын пенсиосъя но жуг-жагез поттонъя федерал катрадлыке пыртыны воштонъёсты эскерозы.
Кун Кенешлэн Тӧроезлэн нырысетӥ воштӥсез меӵак эфирын кылзӥсьёслэн юанъёссылы валэктонъёс сётӥз. Пичи Пурга ёросысь Алганча-Игра гуртын улӥсь Алевтина Васильева тунсыкъяськиз - уг луы-а паськытатыны гурт стаже пырись ужинтыослэсь лыдзэс? Туннэ, кылсярысь, гурт удысын ужамен уг лыдъясько «Сельхозхимия» огазеяськонын ужам аръёс. Соин валче отын тыршем муртъёс гуртын кема ужам муртъёслы пенсизы вӧзы чаклам ватсэтъёсты басьтыны уг быгато.
Алнаш станциын улӥсь Екатерина Башировалэн юанэз герӟаськемын егитъёслэн ужаны луонлыкъёсынызы. «Ужинтыос ӧвӧлэн, уноез Татарстанэ ветлоно луо. Дорамы спирт поттон завод пуктыны кутскизы вал, но сое йылаз-пумаз ӧз вуттэ. Кема-а озьы бускель улослэсь экономиказэ ӝутомы на?» - сюлмаськемзэ вераз нылкышно.
Кияса ёросысь кылзӥсьёс ӝожтӥськизы гуртъёсын вылӥ ӟечлыко герӟет но интернет ӧвӧл шуыса, Балезино ёросын улӥсьёс ӵектӥзы жуг-жагез поттэм понна тыронъёслэсь быдӟалазэс гуртоос понна пичиятыны. Владимир Невоструев оскытӥз, котькуд юанъя уж ортчытэмын, эфире жингыртэм кылзӥсьёслы пыр-поч валэктонъёс сётэмын луозы шуыса.



Возврат к списку