«Подарок своими руками» ужрад – сюлэм дорысь сюлэм доры

Туэ Кун Кенешысь депутатъёс кыкетӥ ползэ ини пыриськизы «Подарок своими руками» ужрадэ. Солы кичӧлтон сётӥз Элькунлэн Тӧроез Александр Бречалов. Кызьы пусъё парламентарийёс, ужрад ӟеч сямлы пӧрмиз ини. Со валаны юрттэ, макем кулэ котькуд адямилы сюлмысь яратон но шунытлык. Кызьы вераз кунэз лэсьтонъя но интыысь аскивалтонъя комиссилэн тӧроез Александр Прозоров, туэ со ас киосын лэсьтэм кык кузьым басьтӥз. Одӥгез – Пичи Пурга ёросысь Дариналэсь, мукетыз – Ижкарысь Михаиллэсь. «Ми тодыны тыршим, кыӵе кузьым возьмало асьсэос пиналъёс, - вераз депутат. – Шараяськиз, Дариналэн семьяезлы телевизор кулэ шуыса. Вужез соослэн тӥяськем. Со интые ми выльзэ дасям. Табере Дариналэн семьяез выль арлы сӥзем передачаосты, Азьмуртлэсь ӟечкыланзэ адӟыны быгатоз. Нош Михаиллы наушникъёс кузьмалом. Кызьы мыным веразы, пияшлэн со льӧль малпанэз».
Кылем арын Александр Прозоров аслаз нылпиосыныз ӵош Алнаш нылпи юртын улӥсь Виктория Субботиналы кузьым дасяз. Викалы телефон кулэ шуыса тодэмез бере, со быдэс семьяеныз солы телефон бырйиз. Нылашен пумиськыны кылдӥз Ижкарын. Алнаш нылпи юртысь вань пиналъёс ӧтемын вал Выль арлы сӥзем празднике. Ваньзылы Александр Прозоров ческыт кузьымъёс сётӥз, нош Викалы – кема возьмам телефонзэ. Бӧрысьгес нылаш вераз, пичи дырысеныз киужен выре шуыса. Будыса, туспуктӥсь луыны малпа.