Версия для слабовидящих
Егит дышетӥсьёслы юрттон вылысь 2019-тӥ арын 19 миллион пала коньдон висъялозы

Егит дышетӥсьёслы юрттон вылысь 2019-тӥ арын 19 миллион пала коньдон висъялозы

06.12.2018
Егит дышетӥсьёслы юрттон вылысь 2019-тӥ арын 19 миллион пала коньдон висъялозы
2019-тӥ арын егит дышетӥсьёслы юрттон вылысь Удмуртилэн коньдэтысьтыз 18 миллион 700 сюрс манет висъяны чаклало. Со сярысь 6-тӥ толсуре журналистъёслы элькунлэн Кун Кенешысьтыз тодосъя, дышетонъя, лулчеберетъя, йӧскалык но егитъёсын ужан политикая но спортъя ялан ужась ӧрилэн кивалтӥсез Татьяна Ишматова ивортӥз.
Солэн кылъёсызъя, Удмуртиын 2015-тӥ арысен ужась программа вуоно арын паськыталоз. Гуртысь егит дышетӥсьёслы сяна, юрттэт карысь ӧнерчиослы но сётозы.
"Бюджетын али со коньдон висъямын: 8 миллион висъямын карын ужась дышетӥсьёслы но гуртъёсын ужась дышетӥсьёслы озьы ик чакламын 10 миллионлэсь тросгес коньдон. Ар ӵоже учком на, кулэлыкез луиз ке, эшшо будэтом на та лыдпусэз", - шуиз Татьяна Ишматова.
Со верамъя, юрттэт али ужаны кутскись дышетӥсьёслы сётӥськоз но куинь ар ӵоже тыриськоз. Нырысетӥ ужан аразы дышетон удысысь егит ӧнерчиос 40 сюрс манет басьтозы, кыкетӥ аре – 60 сюрс, куинетӥ аре – 80 сюрс.
Кызьы пусйиз Татьяна Ишматова, туннэ нуналлы Удмуртиын дышетӥсьёс уг тырмо. Тужгес но бадӟым кулэяськон химия, биология, физика но математика тодметъёсъя ӧнерчиослы. Ижкаръя лыдпусэз учконо ке, шоркарысь школаослы 300-лэсь трос дышетӥсьёс кулэ.


Возврат к списку