Версия для слабовидящих
Удмуртилэн нырысетӥ азьмуртэзлэн шайгу вылаз синпелет пуктӥзы

Удмуртилэн нырысетӥ азьмуртэзлэн шайгу вылаз синпелет пуктӥзы

15.10.2018
Удмуртилэн нырысетӥ азьмуртэзлэн шайгу вылаз синпелет пуктӥзы
15-тӥ коньывуонэ Ижкарлэн Хохряки шайвылаз Удмуртилэн нырысетӥ азьмуртэзлы Александр Волковлы синпелет усьтӥзы. Ужрадэ пыриськизы Удмуртилэн Тӧроез Александр Бречалов, элькунысь Кун Кенешлэн Тӧроез Алексей Прасолов.
Памятник пуктыны мылкыд каризы Александр Волковлэн ӵыжы-выжыосыз. Солэн Андрей пиез верамъя, ӵапак 15-тӥ коньывуонэ 2000-тӥ арын Удмуртилы азьмуртэз быръёнъёс ортчизы. Александр Александрович та интые куинь пол бырйиськылӥз.
«Милям сое кун ужасез сямен возьматэммы потӥз, малы ке шуоно со 20 арлэсь кема элькунэн кивалтӥз но улосвылысь валтӥсь объектъёс солэн тыршеменыз, чидаменыз кылдӥзы. Со ассэ элькунлэн дэлетлыкезлы сётӥз», - шуиз Андрей Волков, Удмуртилэн нырысетӥ азьмуртэзлэн пиез.
Сӥё-дано ужрадэ озьы ик пыриськизы удысэтъёслэн кивалтӥсьёссы, мер но кун ужасьёс.
«Солы Россилэн туала историысьтыз тужгес секыт вакытэз шедиз, куке дунлыкъёс куашказы, кунэн кивалтон сӧзнэт гинэ ӧвӧл, адямиослэн улонзы но куашказ. Мон малпасько, трослы ӵапак солэн тыршеменыз Удмуртия возиськиз. Мон трос ветлӥсько элькунэтӥ, адӟисько, гурт улэ, азинске шуыса, нош отын кылдытэм инфраструктуралы мукет улосвылъёс вожъяськыны быгато», - шуиз Александр Бречалов.
Андрей Волковлэн верамезъя, синпелетэз тодмо скульптор Павел Медведев кылдытӥз.
Ватсалом, туннэ ик Кузебай Герд нимо йӧскалык музейын Удмуртилэн кунлык нуналэзлы но Александр Волковлы сӥзем «Под личную ответственность» адӟытон усьтӥськиз.
Ивор дасямын "Удмуртия" ивортодэтъя агентство юрттэмъя.

Возврат к списку