Версия для слабовидящих
Кун Кенешын выль сельхозтехника лэсьтон ужпумъёсты эскеризы

Кун Кенешын выль сельхозтехника лэсьтон ужпумъёсты эскеризы

08.10.2018
Кун Кенешын выль сельхозтехника лэсьтон ужпумъёсты эскеризы
Витетӥ коньывуонэ Кун Кенешысь агропром огъетъя, музъем кусыпъёсъя, инкуазез уже кутонъя но утёнъя ялан ужась ӧрилэн тӧроез Владимир Варламов кивалтэм улсын выль сельхозтехникаез уже кутонъя кенешон ортчиз. Аслэсьтыз изобретениоссэ вӧлмытыны юрттэт курыса Кун Кенешлэн Тӧроезлы Алексей Прасоловлы но депутатъёслы вазиськиз Удмуртиысь техника наукаосъя дано ужась, техника наукаосъя доктор Леонид Максимов. Пиеныз ӵош со картошка но кешыр утялтонъя выль машинаос кылдытӥз. Со - сеялка, кешырлэсь куарзэ утялтонъя но кешыр октонъя комбайн. Леонид Максимовлэн изобретениосыз Росси наградосын пусъемын, пӧртэм адӟытонъёсын призёр луэмын. Ӧнерчиос солэсь выль техниказэ умоен пусъё, озьы ке но тросэн лэсьтон борды басьтӥськисьёс ӧз шеде.
Леонид Максимов агрегатъёссэ предприятиосын поттыны луонлык утчаса депутатъёслы куронэн вазиськиз. Со пусйиз: тодосчиосын малпам но кылдытэм выль сельхозмашинаосты производствое пуктон понна элькунамы соослы дунъет сётонъя но улонэ пыӵатонъя сӧзнэт кылдытыны кулэ. Та пумысен Леонид Максимов пӧртэм кивалтон ёзэсъёсы вазиськылӥз, но юртэтт сётӥсь ӧз шедьы.
Владимир Варламовлэн верамезъя, выль изобретениос Удмуртилы гинэ ӧвӧл, мукет улосъёслы но тунсыко луыны кулэ. Соосты лэсьтыны секыт ӧвӧл, но ужез трослы капчиято. «Ӵапак сыӵе техника кулэ асьме гуртоослы», - шуиз Владимир Варламов.
Элькунысь промышленностья но вузкаронъя министр Виктор Лашкарев верамъя, та техникаез тросэн потттыны кутсконо ке, соосты басьтӥсьёс луозы-а шуыса эскероно. «Ваньзэ рос-прос лыдъяно – кӧня коньдон быроз, кыӵе рискъёс вань», - шуиз министр.
Леонид Максимовлэсь изобретениоссэ производствое пуктон ужпумъёсын тунсыкъяськемзэс шараязы Удмуртиысь промышленной предприятиослэн ассоциацизы но «Реммаш» акционер огазеяськон.
Нырысетӥ вамыш лэсьтыса выль техникалэсь гуртоос понна кулэлыксэ эскерыны, кӧня коньдон кулэ луоз но трос-а вузаны луоз шуыса эскеронъёс радъяны кенешизы.Со сяна произзводствое пыӵатон понна кулэ ужкагазъёс дасяны кулэ. Та ужез Леонид Максимовлы Ижысь гурт возёсъя кун академиен ӵош лэсьтыны дэмламын.
Кун Кенешысь агропром огъетъя, музъем кусыпъёсъя, инкуазез уже кутонъя но утёнъя ялан ужась ӧри ужлэсь кызьы азинскемзэ эскерыса возёз.


Возврат к списку