Ыбылӥськон тӥрлык лэсьтӥсьлэн нуналэз улсын Ижкарысь Вормонлэн сквераз сяська понӥзы

Ижкарын Ыбылӥськон тӥрлык лэсьтӥсьлэн нуналэз улсын ожгар но ужан славалэн синпелетэз доры сяська понӥзы. Ветеранъёс, мерлыко ужасьёс-патриотъёс, кадетъёс но школаын дышетскисьёс Быдӟым Атыкай ож дыръя Удмуртиын ужасьёсты буре ваизы. Ужрадэ пыриськизы Кун Кенешысь депутатъёс но.
Радъясьёс пусйизы, 4 ожгар аръёс ӵоже Ижкарын сомында ыбылӥськон тӥрлык лэсьтӥзы, кудмында ож азьын 92 ар ӵоже ӧз лэсьтэ.
Дано караул но нимлыко делегация ыбылӥськон тӥрлык лэсьтӥсьёслэн Евгений Драгуновлэн но Геннадий Никоновлэн буре ваён пул азязы но Ижкарысь ыбылӥськон тӥрлык лэсьтӥсьёслэн синпелетсы доры сяська понӥзы. Люкаськемъёс озьы ик Совето Союзлэсь геройзэ Дмитрий Устиновез но тодмо конструкторез Михаил Калашниковез буре ваизы. Ӵапак Михаил Тимофеевич ыбылӥськон тӥрлык лэсьтӥсьёслэн праздниклысэн кичӧлтӥсез вал.
«Михаил Тимофеевичен, Дмитрий Устиновен валче асьме элькунмы, асьме оружейной шаермы лэсьтэ ваньзэ, Россия кужмо мед луоз но ассэ утьыны мед быгатоз шуыса. Туннэ асьме Удмуртия ыбылӥськон тӥрлык быдэс Европалэсь ятыр поттэ. Ми – оружейникъёс», - пусйиз Кун Кенешлэн кивалтӥсез Алексей Прасолов.
Тодмо конструкторлэн нылызлэн Елена Калашниковалэн верамезъя, Ыбылӥськон тӥрлык лэсьтӥсьлэсь нуналзэ пусъён элькунын сямлы пӧрмыны кулэ.
«Туж потэ сӥземе, та сям мед муромоз но паськыталоз шуыса. Умой луысал, оружейникъёслэн скверзы кылдысал ке. Отын соослы сӥзьысалзы бюст. Мед будоз оружейникъёслэн лыдзы», - вераз Елена Калашникова, М.Т. Калашников нимо улосвылкуспо мер фондлэн тӧроез
Ватсалом, удрадэ элькун кивалтэтлэн тӧроез Ярослав Семёнов, Кун Кенешлэн депутатъёсыз, министерствоослэн кивалтӥсьёссы пыриськизы.
Сяська понон бере геройёсты минут ӵоже чус улыса буре ваизы.
Ивор дасямын "Удмуртия" ивортодэтъя агентство юрттэмъя.