2019-тӥ арын Удмуртиын дышетон удысысь объектъёсты тупатонлы 2 миллиард манет висъяны чаклало

Удмуртиысь дышетон удысысь ужъюртъёсты тупатонлы 2019-тӥ арын кык миллиард манет висъяны чаклало. Со сярысь Удмуртилэн тӧроез Александр Бречалов улосвылысь Кун Кенешлэн куатетӥ ӧтчамезлэн 7-тӥ сессиезлэн кыкетӥ пумиськоназ 18-тӥ куарусёнэ ивортӥз.
Элькунлэн кивалтӥсез верамъя, та дыре Удмуртиын дышетонъя объектъёсын инвентаризация йылпумъяське. Улосвыллэн кивалтэтэзлы тужгес алама юртъёсты выльдыны луонлык шедьтыны ужпум пуктэмын. Соин валче Александр Бречалов пусйиз, та уж капитальной тупатъянъёсты чакла, «пасьёсты ворсан» гинэ ӧвӧл.
«Али сумма ӵапак кык миллион манетлэсь ортче. Валамон, со бюджетысь финансирование уз луы. Вань милям кӧня ке амалъёс. Ми нимысьтыз финансовой продукт кылдытӥськом, тыршиськом юрттэт басьтыны Россиысь сыӵе бадӟым компаниослэсь, кудъёсызлэн таӵе ужез сроклэсь азьвыл быдэстыны луонлыксы вань», - шуиз Александр Бречалов.
Удмуртилэн тӧроез пусйиз, таяз арын элькун тӧрлыкъёс тужгес алама сюресъёсын югдурез тупатон понна рос-прос тыршизы. Вуоно арын саклык мерлыко инфраструктуралы висъяськоз. Нырысь ик со пиналъёсын герӟаськем объектъёслы чакламын.
Александр Бречалов депутатъёсты та уж борды итӥськыны но ӵектонъёс но кичӧлтонъёс дасяны куриз.
Ивор дасямын "Удмуртия" ивортодэтъя агентство юрттэмъя.