Версия для слабовидящих
10 сюрслэсь трос адями люкаськиз Удмуртиын «Гербер» элькун празднике

10 сюрслэсь трос адями люкаськиз Удмуртиын «Гербер» элькун празднике

17.06.2018
10 сюрслэсь трос адями люкаськиз Удмуртиын «Гербер» элькун празднике
Тулыс бусы ужъёсты йылпумъянэз пусйизы Удмуртиын 16-тӥ инвожое. Ува ёросысь Пекшур гурт вӧзысь возь вылэ элькун Гербере туэ 10 сюрслэсь трос адями вуиз.Соос пӧлын вал Кун Кенешлэн Тӧроез Алексей Прасолов, элькун парламентысь депутатъёс.
Праздниклэн валтӥсь темаез луизы воршудъёс. Герберез сӥё-дано усьтон ужрадын ӵапак воршудэз утись мумыос калыкез пумитазы — Жикья, Можга, Вамья, Тукля, Ӟумья, Пельга, Чунча.
Люкаськем калыкез тулыс бусы ужъёсты быдэстэмен ӟечкылазы, но умой бусьтыр ю-нянь октыны сӥзизы элькун но ёрос кивалтӥсьёс.
Сяме пыӵамъя, праздникын усто ужасьёсты пусйизы. Муниципал кылдытэтъёслэн гурт возёсъёсты тулыс бусы ужъёслы дасянъя вожвылъяськонзылы йылпумъянъёсъя вормисе потӥзы Алнаш но Вавож ёросъёс, кыкетӥ инты басьтӥз Можга ёрос, куинетӥ — Вотка ёрос.
Озьы ик устооссэ трактористъёсты сӥлы каризы. Ӵошатсконын вормисьёс пӧлын Михаил Кольцов (Сьӧлта ёросысь «Батыр» огазеяськон), Александр Анточ (Дэри ёросысь Азин нимо огазеяськон), Рудольф Балобанов (Эгра ёросысь «Рассвет» огазеяськон), Константин Потапов (Дэри ёросысь «Путь Ильича» огазеяськон), Анатолий Паушев (Сюмси ёросысь «Нива» колхоз) но Алексей Березин (Ува ёросысь «Свобода» гурт возёс). Ваньзы соос Удмуртилэн тӧроезлэсь таукаронъёс но коньдонкузьым басьтӥзы.
Котьку сямен, шулдыр мылкыд кузьмазы творчествоя коллективъёс, ужазы чеберлыко киужъёсъя адӟытон-вузкарон, мастер-классъёс.
2019-тӥ арын удмуртъёслэн Гербер элькун праздниксы Эгра ёросын ортчоз.



Возврат к списку