Кун Кенешысь Егитъёслэн парламентэнызы кивалтоз Константин Алексеев
30.05.2018
Туннэ Кун Кенеш бордын кылдытэм Егитъёслэн парламентсылэн ньылетӥ ӧтчамез нырысетӥ сессизэ ортчытӥз. Егит парламентариос асьсэлы кивалтӥсь бырйизы но азьпал ужъёссы сярысь юанъёс ӝутӥзы. Сессилэн ужаз пыриськизы Кун Думалэн депутатъёсыз Андрей Исаев, Валерий Бузилов, Алексей Загребин, ялан ужась ӧриослэн кивалтӥсьёссы.
Ужрадэз усьтӥз Кун Кенеш Тӧролэн воштӥсез, тазалыкез утёнъя, демографияя но семья политикая ялан ужась комиссилэн кивалтӥсез Надежда Михайлова. Асьсэлы кивалтӥсь быръемлэсь азьло, ужрадэз нуиз Кун Кенешлэн Тӧроез Алексей Прасолов.
Повесткалэн одигез валтӥсез юан – Егитъёслэн парламентсылэсь кивалтӥсьсэ быръён
луиз. Лушкем куара сётэмзы бере, Константин Алексеевез Тӧроен бырйизы. Озьы ик, лушкем куара сётыса, кивалтӥсьлэн воштӥсьёсыз но быръемын вал: Евгений Шиляев, Мария Созыкина но Артур Салимгараев. Туннэ ик 9 профилья комитетъёслэсь кивалтӥсьёссэс бырйизы.