Воштонъёс пыртӥзы бюджет сярысь катэ

24-тӥ оштолэзе Алексей Прасолов кивалтэм улсын ортчиз Кун Кенешлэн 5-тӥ сессиез. Солэн ужаз пыриськизы Удмуртилэн Тӧроез Александр Бречалов, Правительстволэн Тӧроез Ярослав Семёнов, валтӥсь федерал инспектор Дмитрий Мусин.
Заседаниын депутатъёс воштонъёс пыртӥзы бюджет сярысь катэ. Соос герӟаськемын казналэсь доход но расход люкетсэ йылэтонэн. Та рад казнае ватсаса 541 миллион манетлэсь ятыргес вуэмын. Бадӟым люкетэз — Россиысь: 23 миллионэз — моногородъёслы юрттэт сётон программая, 200 миллионэз — Россиысь Правительстволэн резерв фондысьтыз Чупчи вамен выж лэсьтонэз йылаз-пумаз вуттонлы, 317 миллион 694 сюрс манетлэсь ятырез — 1-тӥ майысен пичизэ уждунэз (МРОТ) йылтон понна. Ватсаса вуэм коньдонэз интыям сяна, депутатъёс министерствоос но ведомствоос куспын уксё люкылӥзы на. Кылсярысь, 100 миллион манетлы йылтэмын Гурт хозяйствоя но сиён-юонъя министерстволы йӧл кысконэз радъянлы, вазен та коньдон учкемын вал техника басьтонлы. Озьы ик 83 миллион манет йылтэмын Лэсьтӥськонъя, ЖКХ-я но энергетикая министерстволы — уксёез кутозы толлы дасяськыны. Законопроектэз кыкетӥ лыдӟемен юнматон азьын 8 поправкаос вуизы на Удмуртилэн Тӧроезлэсь. Соос озьы ик герӟаськемын федерал бюджетысь юрттэтэн. Тодмо луиз: Москваысь 2018-тӥ арын 632 миллион манет, 2019-тӥ арын 469 миллион манет вуоз яслиос пуктонлы. Со борды эшшо 148 миллион манет ватсаськоз элькун казнаысь. Та сяна, 52,8 миллион манет федерал казнаысь лыктоз Глазовысь вокзалэз выльдонлы. Выль воштонъёсты-выльдонъёсты лыдэ басьтыса, элькун казналэн доход люкетэз 69 миллиард 396 миллион манет луиз, расход люкетэз — 69 миллиард 113,4 миллион манет. Профицитэз ӧз воштӥськы — 283 миллион манет.