Версия для слабовидящих
Кун Кенешысь ялан ужась комиссиен кивалтӥсь Юрий Тюрин: Выт тросгес люкаське

Кун Кенешысь ялан ужась комиссиен кивалтӥсь Юрий Тюрин: Выт тросгес люкаське

05.04.2018
Журналистъёсын пумиськылӥз Кун Кенешысь Бюджетъя, вытъя но коньдон ужпумъёсъя ялан ужась комиссилэн кивалтӥсез Юрий Тюрин. — Берло кык арзэ бюджетэз поттӥськом калык лыдӟонъёс пыр, — пусйиз ялан ужась комиссиен кивалтӥсь. — 2017-тӥ арын, кылсярысь, кылзонъёсы 200 пала адями пыриськиз. Бюджетэз кутыку, валтӥсь ужпум пуктэмын вал: уждун, пенсиос, компенсациос но калыклы мукет тыриськонъёс дыраз вуыны кулэ. Со сяна, пыриськоно софинансирование амалэн ужась федерал программаосы, шуом, трос калык люкаськылон интыосты тупатъянлы, культурая юртъёсты выльдонлы сӥземъёсаз. Вылаз ик, сюлмаськоно элькун пунэмъёсты пичиен-пичиен ке но кулэстон сярысь — берло 9 ар ӵоже соос 49 миллиард манетлэсь ортчизы ни вал.
Оскон вань, улон-вылонмы ӟеч луыны кутскоз шуыса. Угось туэ январь-февраль ӵоже элькун бюджетэ, кылем арын сярысь, 6 процентлы тросгес выт люкаськиз. Талы луыса феврале ортчем сессиын бюджет сярысь законэ воштонъёс пыртэмын — доход люкетэз 3 миллиард 745 миллион манетлы, нош расход люкетэз 4 миллиард 469 миллион манетлы йылтэмын. Озьы ватсаса коньдон чакламын сакыр диабетэн, лек пыктосъёсын но шер пумиськылӥсь висёнъёсын курадӟисьёслы эмъюмен юрттонлы, нылпиосты дышетонлы но ваньмон дырзэс радъянлы. Ужбергатӥсьёслы ужаны каньылгес мед луоз шуыса, берло дыре гинэ 2 законъёсы воштонъёс пыртэмын ни. Одӥгез соос пӧлысь — 2021-тӥ арозь нуйтэмын патент басьтыса яке упрощённой системая ужась ужбергатӥсьёслы нулевой ставкаен каникулъёс. Кыкетӥез — упрощённой системая налог тырисьёслы 5, 10 но 15 процентъем ставкаос юнматэмын. Калыклы услугаос сётонэн вырисьёслы тужгес пичиез ставка тупатэмын. Юрий Тюрин матысь дыре комиссиен быдэстоно ужпумъёс вылэ но дугдӥз. Данакез соос герӟаськемын Россилэн Президентэзлэн Федерал Собранилы посланиеныз. Кылсярысь, В. Путинлэн одӥгез поручениез — ваньбурлы кадастровой дун пуктонэз тыро-пыдо радъяно, со дуногес медаз луы рынокын дунлэсь.

Возврат к списку