Грак черкогуртын ортчизы Ашальчи лыдӟонъёс

4-тӥ оштолэзе Грак черкогуртын ортчизы нырысетӥ удмурт нылкышно кылбурчи Ашальчи Оки (Акилина Векшина) вордӥськем дырысен 120 ар тырмонлы сӥзем лыдӟонъёс.
Ужрадэз сӥё-дано усьтӥзы элькун парламентысь тодосъя, дышетонъя, лулчеберетъя, йӧскалык но егитъёсын ужан политикая но спортъя ялан ужась ӧрилэн кивалтӥсез Татьяна Ишматова, нациосын ужан политикая министр Лариса Буранова, Грак ёрос йыр Виктор Белов но депутатъёслэн ёрос Кенешенызы кивалтӥсь Михаил Крестьянинов, «Удмурт нылкышно кенеш» огазеяськонэн кивалтӥсь Надежда Степанова. Ваньзы пусйизы, макем бадӟым инты басьтэ удмурт литератураын, культураын но удмурт движенилэн азинсконаз Ашальчи Оки. «Ашальчи Оки асьмемыз ваньместы туннэ огинэ люказ. Туннэ нуналлэн шуныд мылкыдыз котьку мед кылёз тӥляд сюлэмъёсады», - пусйиз Татьяна Ишматова. Депутат тау кариз Грак ёрос администрацилы шуныт ужрад дасямзы понна. Гожъяськись сярысь тодэ ваёнъёссэс мадизы агаезлэн внукез Владимир Векшин, Ашальчи Окилы сӥзем музеен кивалтӥсь Михаил Козлов но мукетъёсыз. Та нуналэ ик Ашальчи Оки нимо элькун премия сётэмын удмурт движениез азинтӥсьёслы Анна Евсеева — театроведлы но Галина Шушакова — тодосчилы.