Версия для слабовидящих
Кун Кенешын Удмуртилэсь дано кунмуртсэ Валентин Калининэз 80 арес тырмонэныз ӟечкылазы

Кун Кенешын Удмуртилэсь дано кунмуртсэ Валентин Калининэз 80 арес тырмонэныз ӟечкылазы

22.03.2018
 Улосвыллэн Кун Кенешаз Удмуртилэсь дано кунмуртсэ, элькунысь Вылӥ Кенешлэн 11-тӥ ӧтчамезлэсь Тӧрозэ Валентин Калининэз данъязы. Туннэ, 22-тӥ южтолэзе, солы 80 арес тырмиз.
Юбилярез ӟечкылазы Кун Кенешлэн Тӧроез Алексей Прасолов, кивалтэтлэн Тӧроез Ярослав Семёнов, гурт возёсъя но сиён-юонъя министрлэсь ужзэ быдэсъясь Ольга Абрамова, Вавож но Можга ёросъёслэн кивалтӥсьёссы, Кун Кенешысь депутатъёс, Мер палаталэн, Ижысь гурт возёсъя кун академилэн ыстэм муртъёсыз, ужъюлтошъёсыз но эшъёсыз.
Алексей Прасолов Валентин Калининлэсь Удмуртиез азинтон понна трос тыршемзэ пусйиз. «Тӥ шер пумиськылӥсь адями, Тӥ — ас калыктылэн йӧно пиез, Удмуртилэн пиез, кудӥз ас улоназ туж паймымонозэ лэсьтӥз. Тӥ 40 ар ӵоже одӥг колхозэн азинлыко кивалтӥды», - пусйиз со. Элькун парламентлэн Тӧроез Вавож ёросысь Мичурин нимо колхозэ нырысьсэ вуылэмзэ тодаз ваиз. Чылкыт утялтэм скалъёс, асьсэ кожазы лэсьтэм автоматизация, нош гидлэн ватсэтаз сауна но бассейн. Сыӵезэ 15 ар талэсь азьло гинэ ӧвӧл, али но шер адӟод.
Удмуртиысь гуртоослэн нимынызы Валентин Калининлы тау кариз Кун Кенешлэн Тӧроезлэн нырысетӥ воштӥсез Владимир Невоструев. «Тӥлесьтыд школадэс тросэз гурт возёсъя академиысь ӧнерчиос, кивалтӥсьёс ортчизы, соос туннэ быдэс кунын ужало», — вераз со но асьме кунысь гурт возёсын туннэ вормонъёс Валентин Егорович кадь кивалтӥсьёслы луыса басьтэмын шуыса ватсаз.
Удмуртилэн Тӧроезлэн Александр Бречаловлэн нимыныз юбилярез кивалтэтлэн Тӧроез Ярослав Семёнов ӟечкылаз. Валентин Калинин ваньзылы шуныт кылъёссы понна тау кариз.

Возврат к списку