Удмуртилэн коньдэтэзлэн табыш люкетэз 2018-тӥ арын 64 миллиард 477 миллион манет луоз. Катӵектосэз элькун парламентын кыкетӥ лыдӟонлы та лыдпус 4 миллиард 826 миллион манетлы будӥз. Коньдонъя валтӥсь ужкагазэз улосвылысь Кун Кенешысь депутатъёс
Алексей Прасолов кивалтэм улсын сессиын юнматӥзы. Тодэ вайытом, ужкагазэз кыкетӥ лыдӟонлы тужгес пусйымон тупатонъёс Удмуртилэн Тӧроезлэсь Александр Бречаловлэсь вуизы. Кылсярысь, 4 миллиард 216 миллион манетлы будэтэмын берыктонтэм вылысь вуись коньдонлэн но коньдэтъёс куспын трансферъёслэн быдӟалазы, вытъёс но выт луисьтэм тыриськонъёс 610 миллион манетлы ватсаськозы шуыса чакламын, со пӧлысь 290 миллионэз мувӧйлэсь вузъёслы акцизъёсъя но 320 миллионэз огазеяськонъёслэн ваньбуретсылы вытъя. Табышъёслэн будэмзы валтӥсь ӧръёсъя азьвыл чаклам расходъёсты йылэтыны луонлык сётэ — уждунъя, мерлыко тыронъёсъя, Эм утетъя фондэ трансфертъёсъя, тазалыкез утёнъя кун программая, кун пунэмъя тыриськонъёсъя но мукетызъя. Озьыен, мерлыко ӧръёсъя коньдон висъян 100 процентлы чакламын (индексациез лыдэ басьтыса но), нош
транспортъя вытэз будэтон чакламын ӧвӧл. Коньдэтлэн уже кутоно люкетэз 63 миллиард 271 миллион манет тыр юнматэмын (нырысетӥ лыдӟемен ӵошатыса, озьы ик 4 миллиард 826 миллион манетлы тросгес), профицит азьвыл кадь ик кылиз — 1 миллиард 206 миллион манет. Нырысетӥ лыдӟон дыръя Удмуртилэн 2018-тӥ арлы коньдэтэзлэн табыш люкетэз 59 миллиард 652 миллион манет пусъемын вал, уже кутоноез — 58 миллиард 445 миллион, технической профицитэз — 1 миллиард 206 миллион манет.
