Яр ёросын тазалыкез утёнъя форумын ужазы 11 эмъяськон учреждениосысь эмчиос

31-тӥ гудырикошконэ Яр ёросын тазалыкез утёнъя форум ортчиз. Та нуналэ ёросысь калык доры лыктӥзы Ижкарысь 11 эмъяськон учреждениосысь эмчиос.
Форумын ужазы офтальмолог, терапевт, кардиолог, онколог, нарколог, эндокринолог, дерматолог. Грипплэсь вакцинация но ортчиз. Таӵе тазалыкез утёнъя форум радъяське элькунамы 22-тӥзэ. Кызьы пусйиз Кун Кенешлэн Тӧроез Владимир Невоструев, калыкез дышетоно асьсэлэсь тазалыкзэс утьыны. «Трос вазиськонъёс лыкто гуртъёсын эмъясьёслэн юрттэмзы кулэ шуыса. Валаськом, туннэ сюлэмшугъяськонъёс вань тазалыкез утёнъя удысын, уг тырмо эмъясьёс, котькуд адями уг быгаты Ижкаре тазалыкзэ эскерыны мыныны. Соин ик каръёсын но ёросъёсын таӵе форумъёс ортчытӥсько», - шуиз Владимир Невоструев.
Ужрадэ озьы ик пыриськизы Кун Кенешлэн Тӧроезлэн нырысетӥ воштӥсез, тазалыкез утёнъя, демографияя но семья политикая ялан ужась ӧрилэн кивалтӥсез Светлана Кривилева, Кун Кенешлэн депутатэз Андрей Волков, Яр ёросысь депутатъёслэн Кенешсылэн Тӧроез Александр Старцев.