Юкаменскын ортчиз 20-тӥ тазалыкез утёнъя форум

Юкаменск ёросын тазалыкез утёнъя форум ортчиз. Ужрадэз усьтыкуз, Кун Кенешлэн Тӧроезлэн нырысетӥ воштӥсез, тазалыкез утёнъя, демографияя но семья политикая ялан ужась ӧрилэн кивалтӥсез Светлана Кривилева вераз, таиз форум 20-тӥ ползэ ини ортче шуыса. « Куинь ар куспын, ми ортчытъям форумъёс элькунлэн ёросъёсаз но городъёсаз, озьы ик Ижкарын но. Туннэ, 20-тӥез юбилей форум, ортче Юкаменск ёросын. 21-тӥез но 22-тӥез Глаз но Яр ёросын луозы», - шуиз депутат.
Кун Кенешлэн Тӧроез Владимир Невоструев верамъя, таӵе форумъёс висёнъёсты шедьтыны гинэ ӧвӧл, тазалыко улон но нуыны юртто. «Туннэ эмъяськыны дуно, соин ик тазалыко улон нуоно», - шуиз элькун парламентлэн кивалтӥсез. Со пусйиз, юкаменск калык спортэз гажа но яратэ шуыса.
Озьы ик ужрадэз усьтонэ пыриськиз Кун Кенешлэн депутатэз Андрей Волков.
Форумын ужазы офтальмолог, терапевт, кардиолог, онколог, нарколог. Ваньмыз ӧвол, 20-лэсь трос эмъясьёс лыктӥзы Юкаменск ёросын улисьёсты эскерыны.