Ижкарысь Устинов ёросын улисьёс тазалыкзэс эскеризы

Кун Кенешысь тазалыкез утёнъя, демографияя но семья политикая ялан ужась ӧри элькунысь тазалыкез утёнъя министерствоен ӵош Ижкарысь Устинов ёросын ортчытӥзы тазалыкез утёнъя форум.
Ужрадэз усьтӥз Кун Кенешлэн Тӧроезлэн нырысетӥ воштӥсез, тазалыкез утёнъя, демографияя но семья политикая ялан ужась ӧрилэн кивалтӥсез Светлана Кривилева. Со сяна, люкаськем калык азьын вераськизы Удмуртиысь физкультурая, спортъя но егитъёсын ужанъя министрлэсь ужзэ быдэсъясь Игорь Краснов, Ижкар думалэн кивалтӥсез Олег Гарин, Ижкар администрацилэн Тӧроезлэн воштӥсез Михаил Тарасов, Кун Кенешлэн депутатэз Владимир Нельзин.
Форуме лыктэм котькуд адями быгатӥз пыр-поч кенешыны эмъясьёсын. Отын ужазы офтальмолог, терапевт, кардиолог, онколог, нарколог. Озьы ик, калык быгатӥз мерттаны аслэсьтыз вирзӥбетсэ, ӝуждалазэ но секталазэ. Со сяна, ужрадын спортъя площадкаос ужазы.