Удмуртиысь уйпал ёросъёс дасясько тазалыко улонъя форумъёс ортчытыны

Кун Кенешлэн Тӧроезлэн нырысетӥ воштӥсез, тазалыкез утёнъя, демографияя но семья политикая ялан ужась ӧрилэн кивалтӥсез Светлана Кривилева Глаз ёросын совещание ортчытиз. Отын вераськизы Яр, Глаз но Юкаменск ёросъёсын ортчоно тазалыко улонъя форумъёс сярысь. Таӵе ужрад «Единая Россия» партилэн но та удысъя ялан ужась ӧрилэн кичӧлтэмзыя радъяське. Кызьы веразы совещаниын, форумын ужалозы терапевт, кардиолог, онколог, дерматовенеролог, опорно-двигательной аппаратлэн висёнъёсызъя, тазалыко сиськонъя эмчиос. Озьы ик, котькудӥз быгатоз мерттаны аслэсьтыз вирзӥбетсэ, ӝуждалазэ но секталазэ.
25-тӥ гудырикошконэ ужрад ортчоз Юкаменск ёросын, 29-тӥ гудырикошконэ – Глаз ёросын, нош 31-тӥ гудырикошконэ – Яр ёросын. «Таӵе форумъёсы туж трос арлыдо адямиос, пичи нылпиосын семьяос лыкто бере, ёрос кивалтӥсьёсты курисько нод-нод дасяськыны, калыклы умой мед луоз ужрадамы», - вераз Светлана Кривилева.