Котырес ӝӧк сьӧрын калыклэн сюлмаськонъёсыз сярысь кенешизы

Кун Кенешлэн Тӧроез Владимир Невоструев котырес ӝӧк сьӧрын калыклэн сюлмаськонъёсыз сярысь кенешонэ пыриськиз. Со ортчиз 26-тӥ апреле шаерысьтымы Профсоюзъёслэн юртазы. Ужрадэ озьы ик пыриськиз Россиысь ужъя но калыкез улон-вылонын утёнъя министрлэн воштӥсез Андрей Пудов. Сое шаерамы ӧтиз Кун Думаысь депутат Андрей Исаев.
Кылем арын Россиысь калыклэн доходэз кулэсмиз. Озьы эшшо 200 сюрс адями улыны тупатэм минимумлэсь ичигес барыш басьтыны кутскиз. Та ваньмыз туэ но шӧдӥськытэк уг кыльы, шуэ Андрей Пудов. Соин ик Правительство ас азяз ужпум пуктэ: начар улӥсьёслэсь лыдзэс кулэстоно. Миым ужтэк пукисьёс 5,4 процент вал ке, туэ та лыдпусэз кулэстон понна сюлмаськозы. Но уж сётӥсьёсын югдур сокем ик капчи ӧвӧл. Андрей Пудов верамъя, банкрот кылён калэ вуэм предприятиос лачак — соослэн ужасьёссы азьын оглом 3,2 миллиард манет тыр пунэмъёссы люкаськемын. Уноезлэн учреждениослэн вузан вылысь ваньбурзы но ӧвӧл ни, озьыен, уждун тырыны номырин. Удмуртиысь бюджет чотын ужась учреждениосын уждун дыраз тыриське. Но со понна, быдэс Россиын сямен ик, асьме шаерамы но вань адямиосты дӥнязы лушкем ужатӥсьёс, уждунэз конвертэн сётъясьёс. Россиын ог 15 миллион адями нокыӵе огкылъёстэк ужа, ӵапак соослы ик Пенсиосъя фондэ нокыӵе отчислениос уг мыно. Нош сыӵеослэсь ичизэ 300 миллиард манет поттыны луысал. Берло 2 ар ӵоже гинэ 4 миллион лушкем ужасьёсты кырмыны, соосты уже закон куремъя интыяны луиз, озьы Пенсиосъя фондэ 27 миллиард манет лыктӥз, шуэ Андрей Пудов.
— Германиын воксё ӧвӧл лушкем ужасьёссы. 3 толэзь уждун уг тыриськы ке, соку ик предприятиез пытсало, — вера Андрей Пудов. — Туннэ котькуд гурт поселениен кивалтӥсь тодэ, кыӵе магазинын я машина тупатъян сэрегын кӧня муртэ лушкем ужато. Соин ик кивалтӥсьёсын валче ужан борды басьтӥськыны малпаськомы.
Югдурысь потон вылысь чакламын уждун тыронэз, выт бичанэн ӵошатыса, нырысетӥ интые поттон пумысен ужпум ӝутыны. Со сяна, матысь 2 ар ӵоже чакламын пичи уждунэз улыны тупатэм минимумен огбыдӟа карыны. Туннэ со минимум 8 сюрс 502 манет. Андрей Исаев верамъя, та ужпумез быдэстон понна нимысьтыз ужан группа но кылдытэмын. Но пичи уждунэз шуак будэтыны но уг луы. Адямиосты ужысь кулэстыны кутскозы шуыса, кышкытлык кылдэ уго.
Туэ февраль толэзе пенсиослэн страховой люкетсылы индексация лэсьтӥзы, шорлыдын котькудӥз пенсионер ог 210 манетлы тросгес уксё басьтыны кутскиз. Но сыӵе ватсэт уг вуы ужась пенсионеръёслы. Та пумысен ӝожомем мылкыдзэс веразы котырес ӝӧк сьӧры люкаськемъёс но. Пенсимы пичиен ужаськомы ук, оло, милемлы но индексация лэсьтоды, вазиськизы соос кивалтӥсьёслы. Андрей Пудов валэктӥз: ужась муртлэн уждунэз вань бере, солэсь пенсизэ будэтыны али чакламтэ, но соос дорозь со суменак вуоз ужысь кошкемзы бере.
Со сяна, гуртоослы юрттэт чакламын. Азьвыл вераськизы вал: быдэс даурзэ гурт хозяйствоын ужам муртлы 2016-тӥ арысен толэзьлы быдэ пенсиез вӧзы ватсаса 25 процент тыриськоз. Но уксё ӧвӧлэн коньдон туннэ ке но гуртоос дорозь ӧз вуы. Андрей Исаев верамъя, гуртоос котьку пичи уждун басьтыса улӥзы, но вань калыкез сюдӥзы, соин ик нырысетӥ паларлэн йылпумъянъёсызъя выльысь берытскыны чаклало та юан борды.