Александр Бречалов элькун кивалтэтлэн ортчем арын ужамезлы йылпумъянъёс лэсьтӥз

25-тӥ оштолэзе Владимир Невоструевлэн кивалтэмез улсын Кун Кенешлэн 30-тӥ сессиез ортчиз. Эскеремын 20-лэсь уно ужпумъёс. Кенешонэ нырысьсэ пыриськиз Удмуртилэн Тӧроезлэсь ужзэ быдэсъясь Александр Бречалов.
Парламентлэн сессиос ортчытъян залаз та нуналэ уката трос калык люкаськиз: депутатъёс ваньзы сямен вуизы. Азьло ик тодмо вал уго: Кун Кенешлэн сессияз нырысьсэ вераськоз Удмуртилэн Тӧроезлэсь ужзэ быдэсъясь Александр Бречалов. Вылаз ик, со йылпумъянъёс лэсьтыны кулэ Правительстволэн кылем арын ужамезлы. Александр Владимирович одӥг удысэз но вератэк ӧз кельты — экономикаын югдурысен кутскыса удмурт кылын книга поттонозь.
— Огъя дунъет урод ӧвӧл, — пусйиз Александр Бречалов. — Тросэз удысъёс азинлыко ужазы, кылсярысь, промышленной предприятиос вуз поттонзэс 7 процентлы йылэтӥзы. Автозаводлэн конвейерысьтыз 6 сюрс пала автомобиль потӥз, обороная предприятиосын лэсьтэм вуз пӧлысь ог 30 процентэз огшоры улонлы чакламын. Импортозамещение программая 6,2 миллиард манет тыр вузъёс поттэмын, ог 85 миллион манет тыр инвестициос кыскемын.
Ушъяз гуртоосты: 183,4 тонна сӥль поттэмын — со 2015-тӥ арынлэсь 6 процентлы тросгес. 614 сюрс тонна йӧл кыскемын — 4,1 процентлы ятыргес. Йӧл кысконъя Приволжск федерал округын 2-тӥ, Россиын 3-тӥ интыын луимы. Ю тысь 542 сюрс тонна басьтэмын, таиз валля арынлэсь 2,2 процентлы уногес…
Зэм, ушъянэн ӵош Александр Бречаловлэн докладаз чузъяськизы чурыт веранъёс но. Кылсярысь, со шуиз:
— Лэсьтӥськон удысын оглом лыдпусъёс уродэсь ӧвӧл — 652 сюрс квадрат метр улон интыос ӝутэмын. Пӧлазы — куашкан калэ вуэм сэрегъёсын улӥсьёсты выль интые выжтон программая лэсьтэмъёсыз но. Адӟи ни куд-огзэ со коркаосты — кыӵе соос уродэсь, вераны кылъёс уг сюро. Отчы улыны выжемъёслэсь туж трос ӝожтӥськонъёс вуо. Матысь дыре вань тырмымтэосты палэнтоно, одӥг ке но ӝожтӥськон быдэсмытэк кылиз ке, иське, Россилэн Президентэзлэсь указзэ ӧм быдэстэ…
Сессия дыръя ик Александр Бречалов ивортӥз: ужысьтыз мозмытэмын тазалыкез утёнъя министрлэсь ужзэ быдэсъясь Алексей Чуршин.
— Туннэ сессия кутскемлэсь азьло пумиськылӥ соин, — ивортӥз Удмуртилэн Тӧроезлэсь ужзэ быдэсъясь. — Алексей Чуршин лыдъя: тазалыкез утён удысын куд-ог тырмымтэос вань, но огъя югдур умой. Мон озьы уг лыдъяськы! Министерстволэсь ужзэ чылкак выль сямен радъяно. Трос янгышъёс оптимизациез ортчытонын, калык озьы ик ӝожтӥське эмъюм люкылон вылэ, эмъюрттэт сётонлэн ӟечлыкез ӧвӧл шуэ но мукет.
Эшшо сюлмаськытэ, пе, элькун казнаен кылдэм югдур. Банкъёс азьын тыриськонъёс кылем ар пумын 48 миллиард манетозь вуизы, со пӧлысь ог 30 процентэз басьтэмын коммерческой банкъёсысь. Тыриськонъёсты луэмезъя пытсано, котькуд манетлэсь кытчы, малы кутӥськемзэ чаклано.
— Вылаз ик, республика тӥяз Россиысь Коньдон ужпумъёсъя министерствоен юнматэм огкылэз, — пусйиз Александр Бречалов. — Соин ик Москва берыктытыны быгатоз ог 14,5 миллиард манетэз. Ярано, со вала асьмемыз, малпасько, югдурысь потыны огкыл шедьтом. Матысь дыре элькунамы вуозы Россиысь Коньдон ужпумъёсъя министерствоысь специалистъёс, валэктозы, кызьы уксё ужпумъёсты валаса радъяно.
Доклад кыстӥськиз 1 час ӵоже. Йылпумъяськиз со таӵе кылъёсын: элькунамы улӥсьёс асьмелы осконзэс медаз ыштэ шуыса, басьтӥськоно зэмос ужъёс борды. Александр Бречалов ужасько, пе, шутэтскон нуналъёсы но, озьы ик тыршыны ӵектӥз Правительстволэн ёзчиосызлы, депутатъёслы.
Доклад бере Кун Кенешысь депутатъёс кӧня ке юанъёс сётӥзы. Одӥгез соос пӧлысь:
— Элькунысьтымы арлы быдэ 2-3 сюрс мурт палэнэ улыны кошке, со пӧлысь тросэз — дышетскем, визьмо специалистъёс. Мар кароно, югдур мед воштӥськоз шуыса?
Бречалов уродэн уг лыдъя Россилы ӟеч кадръёсты келяммес — ваньмы одӥг кыткетын луыны кулэ, пе. Нош югдур воштӥськоз, шуиз, ӟеч уждунэн ужан интыос кылдытӥм ке.
— Удмуртия — туж синмаськымон, данъяськымон инты, со чик ляб ӧвӧл мукет улосъёслэсь, — вераз Александр Бречалов. — Но малы ке ассэ возьматыны уггес дӥсьты. Та бордын ужано. Кылсярысь, П. Чайковскийлы сӥзем фестивальёс сярысь быдэс дунне тодыны кулэ. Асьмелы но ортчытъяно бадӟым спорт ӵошатсконъёс — Татарстан со вылын гинэ кӧня инвестициос кыске. Экономикаез одно азинтоно, талы республикамылэн луонлыкъёсыз бадӟымесь. Туэ июльлы кылдытыны кулэ ни Удмуртилэсь инвесторъёслы чаклам картазэ — отчы пусйиськозы улосмес азинтонъя вань проектъёс — пичиосыз но, бадӟымъёсыз но.
Кун Кенешлэн Тӧроез Владимир Невоструев журналистъёслы вераз:
— Удмуртилэн Тӧроезлэсь ужзэ быдэсъясь ужпум пуктэ: элькунмылэсь данзэ будэтоно, жаляса верано, берло дыре со усиз. Та ужпумез Правительство гинэ огназ быдэстыны уз вормы. Кулэ луозы законъёс, соин ик уртче ужано.
А. Бречаловлэн докладаз кылпум поттылэмын вал котькуд манетэз валаса кутон, шыръян сярысь но. Владимир Невоструев та пумысен шуиз:
— Депутатъёслэсь лыдзэс 90-ысь 60 кельтӥм ни. Озьы туэ 30-лы ӧжытгес депутат быръём. Нош вуоно ӧтчамысен кулэсмозы ялан ужась комиссиослэн но, Кун Кенешлэн аппаратаз ужасьёслэн но лыдзы.